28/Декабрь/2022 Таълим
ТОШКЕНТ, 28 декабрь. /«Дунё» АА/. Ахборот технологиялари ва коммуникацияларини ривожлантириш вазири Шерзод Шерматов Ҳиндистоннинг Acharya университети директори Вишеш Чандрашекар билан учрашув ўтказди, деб хабар бермоқда «Дунё» АА мухбири.
Вазирлик маълумотига кўра, унда IT таълими соҳасида ўзаро ҳамкорликни кучайтириш масалалари муҳокама қилинди.
2022–2026 йилларга мўлжалланган Янги Ўзбекистоннинг тараққиёт стратегиясига мувофиқ, Бухоро вилояти Қоракўл туманида рақамли технологияларга ихтисослаштирилган алоҳида замонавий талабларга жавоб берадиган ахборот технологиялари соҳасида таълимдан ишлаб чиқаришгача бўлган яхлит занжир яратишни кўзда тутадиган IT-кластер фаолияти йўлга қўйилмоқда.
Ушбу IT-кластер 5 минг 600 ўринга мўлжалланган унивеститет, 100 ўринга мўлжалланган инкубация маркази ва 50 ўринга мўлжалланган масофавий хизматлар экспорт маркази, 1 435 ўринга мўлжалланган талабалар турар жойи ва ходимлар учун меҳмонхона, ошхона, очиқ ва ёпиқ турдаги спорт мажмуаларини ўз ичига олиши режалаштирилган.
Ахборот технологиялари ва коммуникацияларини ривожлантириш вазирлиги, Бухоро вилояти ҳокимлиги билан жорий йилнинг 10 октябрь санасида Ҳиндистоннинг «Acharya Institutes» ўртасида «Acharya International University of Uzbekistan» университетини ташкил этиш бўйича ўзаро ҳамкорлик шартномасини имзоланган эди.
Бўлиб ўтган учрашувда ушбу йўналишдаги ишларни давом эттириш, ўзаро ҳамкорликда янги лойиҳаларни ишлаб чиқиш масалалари атрофлича муҳокама қилинди.
