04/Февраль/2022 Ўзбекистоннинг хориждаги ваколатхоналарида
ВАШИНГТОН, 4 февраль. /«Дунё» АА/. АҚШ Конгресси билан 2022 йилдаги парламентлараро ҳамкорлик режаларини муҳокама қилиш мақсадида мамлакатимиз элчиси Жавлон Ваҳобов Вакиллар палатасидаги «Ўзбекистон бўйича кокус» ҳамраислари, конгрессменлар Трент Келли (Миссисипи) ва Висенте Гонсалес (Texaс) билан учрашувлар ўтказди, деб хабар қилмоқда «Дунё» АА мухбири.
Учрашувлар чоғида конгрессменлар мамлакатимизни ўзаро дипломатия муносабатлари ўрнатилганининг 30 йиллиги, Ўзбекистон ва АҚШ ўртасидаги стратегик шерикликнинг 20 йиллиги ҳамда Ўзбекистон Мудофаа вазирлиги ва Миссисипи Миллий гвардияси ўртасида ҳамкорлик ўрнатилганининг 10 йиллиги билан табриклади. Шу муносабат билан, америкалик қонун ижодкорлари АҚШ Конгрессида бўладиган тингловлар чоғида «Сўнгги 30 йил ичида рўй берган энг барқарор муваффақиятлар тўғрисида» мавзусида маъруза қилишга тайёр эканини билдирди.
«Ўзбекистон бўйича кокус» ҳамраислари 2022 йил май ойида АҚШ Конгресси делегацияси мамлакатимизга ташриф буюришга тайёргарлик кўраётганини маълум қилди. «Мен ҳар сафар ажойиб мамлакатингизда бўлганимда ўзим учун янги нарсаларни кашф қиламан. Шу боис АҚШ Конгресси делегацияси таркибида Ўзбекистонга навбатдаги сафаримни ҳам интиқлик билан кутяпман», деди Трент Келли.
Музокаралар чоғида АҚШ қонунчилари ўз идоралари тез орада бошқа конгрессменларни республика мустақиллигининг 30 йиллиги муносабати билан Ўзбекистон мустақиллиги ва суверенитетини қўллаб-қувватлаш бўйича Конгресснинг махсус резолюцияни тайёрлашга ҳаммуаллиф бўлишга таклиф қилишини маълум қилди. Уларнинг сўзларига кўра, Конгресс томонидан ушбу ҳужжатнинг маъқулланиши мамлакатларимиз ўртасида дипломатик муносабатлар ўрнатилганининг 30 йиллиги нишонладиган 2022 йилда тарихий воқеага айланади.
Умуман олганда, конгрессменлар Трент Келли ва Висенте Гонсалес билан учрашувлар чоғида Ўзбекистон-АҚШ кун тартибининг долзарб масалалари, жумладан, парламентлараро алоқалар бўйича доимий ҳамкорликни ривожлантиришга келишиб олинди. Шунингдек, америкалик қонунчилар АҚШ Конгрессидаги «Ўзбекистон бўйича кокус» дўстлик гуруҳига бошқа конгрессменларни фаол жалб қилишда давом этишини билдирди.
Таъкидлаш жоизки, жорий йил 19 февраль куни Ўзбекистон ва АҚШ ўртасида дипломатик муносабатлари ўрнатилганига 30 йил тўлади.
Телеграм учун: АҚШ Конгресси аъзолари мамлакатларимиз ўртасида дипломатик муносабатлар ўрнатилганининг 30 йиллиги бўйича махсус маъруза тайёрламоқда
19 февраль куни Ўзбекистон ва АҚШ ўртасида дипломатик муносабатлар ўрнатилганига 30 йил тўлади
