06/Декабрь/2022 Факт
ТОШКЕНТ, 6 декабрь. /«Дунё» АА/. "Аэрофлот" авиакомпанияси Санкт-Петербургдан Тошкент ва Самарқандга мунтазам парвозларни амалга оширишни режалаштираётир, деб хабар бермоқда «Дунё» АА мухбири “Uzbekistan Airports” манбасига таянган ҳолда.
Россия авиакомпанияси Санкт-Петербург — Тошкент ва Санкт-Петербург — Самарқанд йўналишлари бўйича мунтазам парвозларни йўлга қўяди.
Санкт-Петербургдан Тошкентга биринчи қатнов 17 декабрга белгиланган. Парвозлар “Боинг 738” самолётларида ҳафтасига уч марта — чоршанба, жума ва якшанба кунлари амалга оширилади.
“Аэрофлот — Россия ҳаво йўллари” штаб-квартираси Москвада жойлашган давлат-хусусий авиакомпаниясидир. “Аэрофлот” гуруҳига, шунингдек, “Россия” авиакомпанияси ва “Победа” лоукостер авиакомпанияси киради.
