21/Март/2023 Саналар
ДУБАЙ, 21 март. /«Дунё» АА/. Ўзбек маданиятини халқаро миқёсда кенг тарғиб этиш тадбирлари доирасида Ўзбекистоннинг Бирлашган Араб Амирликларидаги элчихонаси ва Дубай шаҳридаги Бош консуллиги иштирокида Дубай Амирлигидаги машҳур “Дубай Опера” мажмуасида Ўзбекистон Республикаси “Баҳор” ансамбли концерт дастури намойиш этилди, деб хабар бермоқда «Дунё» АА мухбири.
Маданий дастур намойишида Бош консуллик ва элчихона таклифига биноан ушбу давлатда фаолият олиб бораётган бир қатор дипломатия ваколатхоналарининг раҳбарлари ва ходимлари иштирок этишди.
Бундан ташқари, ушбу маданий тадбирга БАА да фаолият юритаётган йирик тадбиркорлар, қатор маҳаллий давлат идоралари ходимлари, санъат арбоблари, оммавий ахборот вакиллари таклиф этилди.
Амирликларда истиқомат қилиб келаётган ватандошларимиз вакиллари ушбу тадбирда фаол иштирок этишгани ҳолда Наврўз байрамини биргаликда нишонладилар.
Тадбир унинг барча иштирокчиларида унутилмас таассурот қолдирди.
