23/Январь/2023 Ўзбекистоннинг ИҲТга раислиги
ТОШКЕНТ, 23 январь. /«Дунё» АА/. Ўзбекистон ўзининг буюк тарихий ва табиий диққатга сазовор масканлари билан ажралиб туради, деди Иқтисодий ҳамкорлик ташкилоти (ИҲТ) бош котиби Хусрав Нозирий “Дунё” АА мухбирига берган эксклюзив интервьюсида.
“Ўзбекистон раислиги туризм соҳасида ҳам жуда фаол кечди, - деб таъкидлади ИҲТ бош котиби Хусрав Нозирий. - 2022 йил Ўзбекистон томонидан ИҲТнинг туризм бўйича 4-вазирлар учрашуви ташкил этилди. Бундан ташқари, ўтган йилда Озарбайжон, Эрон, Покистон, Тожикистон, Туркия, Туркманистон ва Ўзбекистоннинг 240 дан ортиқ туроператорлари ва сайёҳлик агентликларини бирлаштирадиган ИҲТ туроператорлари тармоғи тузилди.
Биз минтақа улкан сайёҳлик салоҳиятига эга эканини яхши биламиз. Айниқса, Ўзбекистон ўзининг буюк тарихий ва табиий диққатга сазовор масканлари билан ажралиб туради. Шу боис биз Ўзбекистонни 2024 йилда Шаҳрисабз шаҳрининг ИҲТ туризм пойтахти этиб сайлангани билан қутлаймиз ва Жаҳон сайёҳлик ташкилоти (UNWTO) Бош ассамблеясининг 25-сессияси жорий йил Самарқанд шаҳрида ўтказилишидан жуда мамнунмиз. Булар бутун дунё эътиборини Ўзбекистонга жалб қилади ва мамлакатнинг сайёҳлик салоҳиятини олдинга етаклайди”.
Интервьюнинг тўлиқ матни билан “Дунё” АА ресурсларида танишасиз.
Анвар Илёсов олган сурат («Дунё» АА)
