28/Март/2023 Ўзбекистон дунё нигоҳида
МАДРИД, 28 март. /«Дунё» АА/. Испаниянинг машҳур «El Imparcial» онлайн-нашрида сиёсий шарҳловчи Рикардо де ла Сернанинг «Орол келажаги» сарлавҳали мақоласи эълон қилинди, деб хабар бермоқда «Дунё» АА мухбири.
Шарҳда эксперт Орол денгизини тиклаш Ўзбекистон ташқи сиёсатининг экологик кун тартибидаги энг муҳим масалалардан бири эканлигини қайд этган. Муаллифнинг ёзишича, Нью-Йоркда бўлиб ўтган БМТнинг Сув масалалари бўйича конференциясидаги чиқишида Саида Мирзиёева Ўзбекистоннинг Орол денгизини тиклаш бўйича олиб бораётган саъй-ҳаракатлари мазмун-моҳиятини батафсил очиб берган ва ҳукуматнинг БМТ доирасида олиб бораётган сиёсатини халқаро даражада қўллаб-қувватлаш муҳимлигини таъкидлаган.
«26 март — Халқаро Орол денгизи куни сифатида нишонланади,- дейилади нашрда. – Бир пайтлар Марказий Осиёдаги бу денгиз дунёдаги тўртинчи йирик кўл эди. Каспий денгизи, Юқори ва Виктория кўлларидан кейинги ўринда қайд этилган. Унинг узунлиги 430 километр ва кенглиги 234 километрни ташкил қилган. Амударё ва Сирдарё сувлари 34 турдаги балиқларнинг фаунасини озиқлантириб, улардан 24 таси озиқ-овқат сифатида фойдаланилган.
Муаллиф таъкидлаганидек, мустақилликка эришгандан бери Ўзбекистон ва Қозоғистон Орол денгизини тиклаш бўйича муҳим ташаббусларни илгари суриб келмоқда. БМТ кўмагида Орол денгизининг экотизимини тиклаш ва унинг ресурсларидан оқилона иқтисодий фойдаланиш орқали уни тиклаш бўйича бир қанча лойиҳалар амалга оширилмоқда.
Мутахассисга кўра, Орол денгизини тиклаш Ўзбекистон ташқи сиёсатининг экологик кун тартибининг энг муҳим йўналишларидан бири ҳисобланади. Президент Шавкат Мирзиёев халқаро анжуманларда бу масалани мунтазам кўтариб келмоқда.
«Умуман олганда, Шавкат Мирзиёев Президент этиб сайланган илк кунлардан бошлаб Ўзбекистонда янги ислоҳотлар, хусусан конституциявий ўзгаришлар, янги ташқи сиёсат, коррупсия ҳамда одам савдосига қарши кураш сингари чуқур институционал ислоҳотлар жараёни бошланди, – дейилади нашрда. – Оролбўйининг нафақат экологик-иқтисодий, балки маданий жиҳатдан тикланиши Ўзбекистон тараққиёт стратегиясида муҳим ўрин тутади».
Муаллиф мақола интиҳосида, Ўзбекистон тажрибаси бу борада бошқа мамлакатларга ўрнак бўла олишини қайд этди.
