17/Декабрь/2022 Ўсиш нуқтаси
ТОШКЕНТ, 17 декабрь. /«Дунё» АА/. Кеча Ўзбекистон инвестициялар ва ташқи савдо вазирининг ўринбосари Олимхон Рустамов бошчилигидаги Ишчи гуруҳ аъзолари Тошкент вилоятининг Янгийўл туманида бўлиб, инвестиция лойиҳаларининг амалга оширилиши билан танишди, деб хабар бермоқда «Дунё» АА мухбири.
ИТСВ маълумотига кўра, ташриф давомида тумандаги Ишчи гуруҳ бир қатор ишлаб чиқариш обектларида бўлиб, лойиҳа ташаббускорлари билан суҳбатлар ўтказди ва муаммоли масалалар, корхоналар фаолиятини янада ривожлантириш бўйича таклифлар белгилаб олди.
Хусусан, гуруҳ аъзолари жинси матодан тайёр маҳсулотлар ишлаб чиқарувчи «FASHION JEANS GARMENT МЧЖ корхонасида бўлди. 2022 йил охирига қадар компания Европа мамлакатларига 1,2 миллион долларлик тайёр жинси маҳсулотларини экспорт қилишни режалаштирмоқда.
Йўналишдаги яна бир объект - гигиена воситаларига шиша идишлар ишлаб чиқарувчи «Grand Hygienic Manufacturing» корхонаси бўлди. Инвестиция лойиҳасига 2 миллион доллар хорижий сармоя киритилди. Корхонада 40 та янги иш ўрни яратилди, унинг ишлаб чиқариш қуввати 1,2 миллион шиша гигиена воситаларини ташкил этмоқда.
Шу куни, шунингдек, 54,6 миллиард сўм хорижий инвестициялар ўзлаштирилган «АЛУКАБЕЛЬ ПАЙРАВ» МЧЖга ҳам ташриф бўлиб ўтди. 60 янги иш ўрни яратилган корхонада йилига 1,68 минг тонна алюминий ва мис кабел ишлаб чиқарилмоқда.
Ташриф якунлари бўйича маҳаллий ҳокимият органлари масъул раҳбарларига маҳсулот ишлаб чиқариш ва экспортини узлуксиз таъминлаш мақсадида лойиҳа ташаббускорларини қўллаб-қувватлаш чораларини кўриш бўйича топшириқлар берилди.
