07/Август/2021 Долзарб
AНҚАРА, 6 август. /«Дунё» АА/. Марказий Осиё давлатлари раҳбарларининг Туркманистонда ўтказилган навбатдаги Маслаҳат учрашуви Туркия эксперт-таҳлил ҳамжамияти вакиллари томонидан фаол таҳлил қилинмоқда, деб хабар бермоқда «Дунё» АА мухбири.
Меҳмет Сейфитдин Эрол, Анқара Инқироз ва сиёсат тадқиқотлари маркази — ANKASAM директори, профессор:
- Афғонистондаги вазият кескинлашаётган вазиятда ушбу саммитнинг ўтказилгани жуда муҳим аҳамиятга эга, - деди турк эксперти. - Ушбу давлат ҳудудида тинчлик ва барқарорликни ўрнатиш Марказий Осиё давлатларининг минтақавий кун тартибидаги асосий банддир. Афғонистоннинг ижтимоий-иқтисодий ривожланиши ва бу давлатнинг минтақа иқтисодий жараёнларига тўла интеграциялашуви Марказий Осиё равнақига бевосита таъсир кўсатади.
15-16 июль кунлари Тошкентда муваффақиятли ўтказилган «Марказий ва Жанубий Осиё: минтақавий ўзаро боғлиқлик. Таҳдидлар ва имкониятлар» халқаро конференцияси, анжуман иштирокчиларининг географияси ва юқори даражаси, шунингдек, мунозаралар давомида тилга олинган минтақа хавфсизлигига оид муаммолар ва таҳдидлар минтақавий масалаларни муҳокама қилиш учун қўшимча учрашувлар ўтказиш зарурлигини кўрсатди.
Туркманистонда Марказий Осиё давлатлари раҳбарларининг учинчи Маслаҳат учрашуви «соатларни тўғрилаб олиш», минтақавий кун тартиби бўйича фикр алмашиш ва долзарб ечимларни талаб қилувчи вазифаларни аниқлаш, шунингдек, кейинги ҳаракатларни мувофиқлаштириш зарурлилигидан далолат беради.
