13/Декабрь/2022 Ҳамкорлик
СЕУЛ, 13 декабрь. /“Дунё” АА/. Ўзбекистон Республикаси ва Корея Республикаси ҳудудлари ўртасидаги амалий ҳамкорликни мустахкамлашга йўналтирилган фаолият доирасида жорий йил 11 декабрь куни Наманган вилояти ҳокимининг биринчи ўринбосари Толиб Юсупов бошчилигидаги делегация Корея Республикасига келди, деб хабар бермоқда “Дунё” АА мухбири.
Делегация таркиби вилоятнинг инновация, тадбиркорликни ривожлантириш, миграция, ахборот-коммуникация технологиялари соҳалари бўйича мутасадди вакиллари, шунингдек, тадбиркорлардан иборат.
Наманган вилояти делегациясининг Сеул, Пусан, Чангвон каби шаҳарларда бўлиб, ўзаро савдо-иқтисодий, қурилиш, миграция, ахборот-коммуникация технологиялари ва туризм соҳаларида ҳамкорлик алоқаларини ўрнатиши режалаштирилган.
Сафарнинг биринчи куни Сеул шаҳрида делегация аъзолари ҳамда ахборот-коммуникация технологиялари соҳасида фаолият юрутувчи етакчи маҳаллий компаниялар иштирокида форум ташкил этилди.
Иккинчи куни эса Пусан шаҳрининг Ахборот технологиялари ассоциацияси раҳбари ва ушбу шаҳарда жойлашган кўплаб компаниялар билан учрашувлар уюштирилгани ҳолда дастурий маҳсулотлар ишлаб чиқиш, маълумотлар базаси билан ишлаш, таълим соҳаси ва бошқа йўналишлар бўйича ҳамкорлик масалалари муҳокама қилинди.
Наманган вилояти делегациясининг Корея Республикасига сафари 16 декабрга қадар давом этади.
