01/Июль/2020 Иқтисодиёт
БEРЛИН, 1 июль. /«Дунё» АА/. Германиянинг нуфузли «BerlinEconomics» тадқиқот гуруҳи, Германия Федерал иқтисодиёт ва энергетика вазирлиги номидан ўтиш даври иқтисодиётига эга давлатлар ҳукуматларига маслаҳат тарзида «Коронавирус пандемик инқирозининг Ўзбекистон иқтисодиёти учун оқибатлари» номли таҳлилий мақоласини эълон қилди, деб хабар бермоқда «Дунё» АА мухбири.
Ушбу тадқиқот материали етакчи иқтисодчи экспертларни бирлаштирган «Германия иқтисодий жамоаси» («German Economic Team») томонидан тайёрланган.
Коронавирус пандемияси ва у билан боғлиқ чеклов чора-тадбирларининг мамлакатимиз иқтисодиётининг ижобий ривожланишига салбий таъсирини ўрганган немис экспертлари Ўзбекистон дунёнинг аксарият мамлакатларидан фарқли ўлароқ, 2020 йилда иқтисодий ривожланишда ижобий динамикани сақлаб қолиб, ялпи ички маҳсулотда 1,5 фоиз ўсишни сақлаб қолиши, мумкин деган фикрда.
Мутахассисларнинг таъкидлашича, коронавирус инқирози шароитида Ўзбекистон иқтисодий моделининг муваффақият калити бу – олдинги юқори ўсиш суръатлари, шунингдек, коронавирус инфекциясига қарши кураш доирасида ҳукумат томонидан олиб борилаётган самарали чоралардир. Ўзбекистонда бизнесни эркинлаштириш ва инвестиция муҳитини яхшилашга йўналтирилган таркибий ислоҳотлар, муҳим валюта захираларининг мавжудлиги ва ташқи қарзнинг нисбатан паст даражаси ҳам муҳим омиллардан бири сифатида қайд этилади.
Германия экспертларининг таъкидлашича, айни пайтда Ўзбекистон «V» иқтисодий ўзгаришларни бошдан ўтказмоқда. Коронавирус ривожланиши паст даражага етганидан сўнг мамлакат тараққиёти “тушкунлик”ка тушиб қолмасдан, кескин ўсишни бошлайди. Эътиборлиси, немис тадқиқотчилари 2021 йил охирига бориб Ўзбекистон ялпи ички маҳсулотининг ўсиши 7 фоизни ташкил этишини тахмин қилмоқда.
