07/Февраль/2023 Маданият
БРЮССЕЛЬ, 7 февраль. /«Дунё» АА/. Буюк шоир ва мутафаккир Алишер Навоий таваллудининг 582 йиллиги муносабати билан Ўзбекистоннинг Бельгиядаги элчихонаси томонидан Ўзбек маданий маркази раҳбари, ёзувчи ва таржимон Шарифжон Аҳмадий билан видеоконференция шаклида мулоқот ўтказилди, деб хабар бермоқда «Дунё» АА мухбири.
Алишер Навоий таваллуд кунини нишонлаш доирасида Нидерландияда қатор тадбирлар ўтказилмоқда. Хусусан, ўзбек ва озар халқларининг азалий адабий-маданий алоқаларига бағишланган «Низомий Ганжавийдан Алишер Навоийга қадар» номли онлайн-анжуман муваффақиятли ташкил этилди. Унда Ўзбекистон, Нидерландия, Германия ва озарбайжонлик адабиётшунос олимлар ва икки улуғ аллома бадиий меросининг мухлислари иштирок этди.
Ушбу мавзудаги навбатдаги тадбир «Афсоналар юртига саёҳат» деб номланиши қайд этилди. 19 февраль куни уюштириладиган ушбу анжуманга мамлакатимизнинг Бенилюкс давлатларидаги элчихонаси бош-қош бўлмоқда. Шунингдек, Туркиянинг Юнус Эмро институти ва қатор ҳаммаслак дўстлар яқиндан кўмак бермоқда. Мазкур тадбир доирасида таниқли мусаввир, Ўзбекистон Бадиий академияси аъзоси Раҳимжон Ҳакимовнинг асарларидан иборат замонавий Ўзбекистон тасвирлари туширилган фотокўргазма ташкил этилади. Шунингдек, ўзбек мумтоз қўшиқлари ижрочилари – “Oxus culture” гуруҳининг мусиқий дастури юртимизнинг бой маданиятини тадбир меҳмонларига яққол намойиш этади.
