08/Июнь/2020 COVID-19
ТОШКЕНТ, 8 июнь. /«Дунё» АА/. Ўзбекистон Республикаси Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи, Республика бош давлат санитария инспектори Нурмат Отабеков «Ўзбекистон 24» телеканалида мамлакатимизда коронавирус билан боғлиқ сўнгги вазият ва ушбу касаллик билан оғриган беморлар саломатлиги бўйича ахборот берди, деб хабар бермоқда «Дунё» АА мухбири.
– Мамлакатимизда коронавирус инфекциясига чалинган фуқаролар сони 4 минг 352 нафарга етди. 7 июнь куни 86, касаллик қайд этилгандан буён эса 3 минг 354 нафар, яъни 77 фоиз бемор тўлиқ соғайган. Соғлиқни сақлаш вазирлиги тақдим этган маълумотга кўра, шифохоналарда 981 бемор даволанмоқда, 6 нафарининг аҳволи оғир, 2 нафарининг аҳволи ўта оғир. 45 мингдан кўпроқ фуқаро карантин тадбирлари билан қамраб олинган. Уларнинг 22 мингга яқини стационар шароитда карантинга жойлаштирилган.
Ҳурматли юртдошлар!
Коронавирус касаллиги бўйича эпидемик вазият мураккаблигича сақланиб турибди. Куни кеча Тошкент шаҳрида 195 нафар, Тошкент вилоятида 10 нафар, Хоразм вилоятида 8 нафар ва Сирдарё вилоятида 4 нафар бемор аҳоли орасида қайд этилди.
Бундан кўриниб турибдики, вазият мураккаблашиб бормоқда. Ҳар биримиз кўчага чиқиш, мулоқотга киришиш орқали касалланишимиз мумкинлигини унутмаслигимиз керак. Карантин тадбирларига тўлиқ риоя қилинг. Дока ниқобда бўлинг, мулоқотларда оралиқ масофани сақланг, уйга қайтганингиздан кейин антисептик воситалардан фойдаланинг.
Минг афсуски, аҳоли орасида бу каби тавсияларга панжа орасидан қараётган, бефарқ муносабатда бўлаётганлар кўпайиб кетяпти. Вазият мураккаблашиб бораётганини билиб турибсиз. Уни ижобий ёки салбий томонга ўзгартириш ҳар биримизнинг ҳаракатимизга боғлиқ эканини унутманг.
