07/Февраль/2023 Саналар
БОКУ, 7 февраль. /«Дунё» АА/. Боку шаҳрида буюк шоир ва мутафаккир Алишер Навоий таваллудининг 582 йиллиги муносабати билан “Алишер Навоий ва ХХI аср” мавзусидаги конференция ўтказилди, деб хабар қилмоқда “Дунё” АА мухбири.
Анжуман Ўзбекистоннинг Озарбайжондаги элчихонаси, Алишер Навоий номидаги Тошкент давлат ўзбек тили ва адабиёти университети ва Озарбайжон Миллий фанлар академияси ҳамкорлигида ташкил этилди.
Тадбирда Ўзбекистон, Озарбайжон, Туркия, Венгрия ва Жанубий Кореянинг йирик навоийшунос-олимлари, илм-фан намоёндалари ва бошқа фахрий меҳмонлар иштирок этди.
Алишер Навоий адабий меросининг жаҳон тамаддунида тутган ўрни, буюк алломанинг номини халқаро миқёсда тарғиб қилишга оид ташаббуслар, мутафаккир асарларининг хорижий тилларга таржима қилиш жараёни, Навоий асарларини чуқур ўрганиш ва бошқа мавзуларга бағишланган маърузалар тингланди.
