03/Февраль/2023 Иқтисодиёт
МАДРИД, 3 февраль. /«Дунё» АА/. Малакатимиз элчихонаси кўмагида «Ўзсаноатқурилишматериаллари» уюшмаси раисининг ўринбосари Баҳодир Исмоилов, Испания «ASCER» кафель ва сопол пол ишлаб чиқарувчилар уюшмаси президенти Висенте Мануэль Номдедеу, уюшма ижрочи котиби Альберто Эчавария ва «Gedepsa» промоутерлик-консалтинг компанияси президенти Алехандро Пастрана ўртасида онлайн-мулоқот ташкил этилди, деб хабар бермоқда «Дунё» АА мухбири.
Учрашувда, шунингдек, «Ўзсаноатқурилишбанк» АТБ мутасаддилари ҳам қатнашди.
Музокараларда Ўзбекистонда «ASCER» билан ҳамкорликда каолиндан тайёр маҳсулотлар ишлаб чиқариш бўйича кластер ташкил этиш лойиҳасини ҳаётга тадбиқ этиш масаласи муҳокама қилинди. Испания сопол плиткалар ишлаб чиқарувчи компаниялари ва Ўзбекистон ишлаб чиқарувчилари ўртасидаги ҳамкорлик алоқаларини йўлга қўйиш бўйича фикр алмашилди.
Мамлакатимиз делегациясининг жорий йил февраль ойида Испанияга режалаштирилаётган амалий сафари дастури кўриб чилди. Ўзбекистон вакиллари сафар чоғида «Azteca», «Porselanosa», «Grespana SA» каби компаниялар раҳбарлари билан музокаралар ўтказиши назарда тутилмоқда.
Маълумот учун: «ASCER» 1977 йилда ташкил этилган, бош қароргоҳи Кастеллон де ла Плана шаҳрида (Валенсия) жойлашган. Уюшма соҳанинг 100 дан корхоналарини бирлаштирган. Тузилма таркибидаги компаниялар Испаниянинг ушбу йўналишдаги ишлаб чиқариш қувватининг тахминан 95 фоизини қамраб олган.
