29/Май/2023 Экспорт
КУАЛА-ЛУМПУР, 29 май. /«Дунё» АА/. Мамлакатимиз элчихона кўмагида Ўзбекистонда етиштирилган гилоснинг навбатдаги партияси Малайзияга етказилди, деб хабар бермоқда «Дунё» АА мухбири.
Ўзбек гилоси мамлакатимизнинг «Gold Dried Fruits» МЧЖ ва «Hamd Business Networks» МЧЖ экспортёр корхоналари томонидан Малайзиянинг «Zarandah Global Sdn Bhd» ва «Izdihar Souk Sdn Bhd» компанияларига етказиб берилмоқда.
«Izdihar Souk Sdn Bhd» компанияси бир неча йилдан бери Ўзбекистондан озиқ-овқат ва қишлоқ хўжалиги маҳсулотларини экспорт қилади. Компания томонидан ўтган давр мобайнида «Bonaff Crunchy» бренди остида музлатиб қуритилган қовун, анжир, ўрик ва жами етти хил турдаги маҳсулотлар сотиб олинган.
Компаниянинг тижорат директори Реймонд Чонг янги узилган ўзбек гилоси Малайзиянинг йирик савдо тармоқларида, шу жумладан компания томонидан яратилган «Snackspot» онлайн платформаси орқали сотилишини билдирди. Маҳсулотларнинг кейинги партияси шу йилнинг июнь ойида етказилиши режалаштирилган.
Ўзбекистон дипломатик ваколатхонаси Малайзиянинг импортёр компаниялари билан ушбу мамлакат бозорларида сотиладиган миллий маҳсулотлар номенклатурасини ошириш бўйича тизимли ишларни давом эттирмоқда.
