22/Сентябрь/2021 ТИВ янгиликлари
ТОШКЕНТ, 22 cентябрь. /«Дунё» АА/. Ўзбекистон Президентининг Афғонистон бўйича махсус вакили Исматулла Эргашев кеча Германия элчиси Тило Клиннер билан учрашув ўтказди, деб хабар бермоқда «Дунё» АА мухбири.
ТИВ манбасига кўра, учрашув давомида томонлар Афғонистондаги вазият, шунингдек, ушбу мамлакатдаги гуманитар ҳолатни муҳокама қилди.
Германия элчиси Ўзбекистоннинг Афғонистонда узоқ муддатли ва барқарор тинчликни ўрнатишдаги муҳим ролини таъкидлади.
Шу билан бирга, Тило Клиннер Афғонистондан Германия ва бошқа чет эл фуқароларини эвакуация қилишда кўрсатган ёрдами учун Ўзбекистон томонига алоҳида миннатдорлик билдирди.
Шунингдек, Германия томонига Ўзбекистоннинг Афғонистон халқига гуманитар ёрдам кўрсатиш ва қўшни давлатнинг иқтисодий тикланишига кўмаклашиш борасидаги саъй-ҳаракатлари ҳақида маълумот берилди.
Эслатиб ўтамиз, Президент Шавкат Мирзиёев 21 сентябрь куни БМТ Бош Ассамблеясининг 76-сессиясидаги нутқида Ўзбекистон яқинда ўзбек-афғон чегарасини очиб, ушбу мамлакатга бирламчи зарур бўлган озиқ-овқат, нефть маҳсулотлари ва электр энергияси етказиб беришни қайта тиклаганини таъкидлади.
