08/Февраль/2023 Иқтисодий дипломатия
ТОШКЕНТ, 8 февраль. /«Дунё» АА/. Ўзбекистон Инвестициялар, саноат ва савдо вазирлигида (ИССВ) видеоконференцалоқа тарзида 2022 йил 25 ноябрдаги БААнинг DP World компанияси билан “Навоий” ЭИЗни бошқариш тўғрисидаги битимда ўз аксини топган “Навоий” эркин иқтисодий зонаси фаолияти самарадорлигини ошириш бўйича лойиҳанинг амалий ижроси муҳокамасига бағишланган музокаралар бўлиб ўтди, деб хабар қилмоқда «Дунё» АА мухбири.
ИССВ маълумотига кўра, музокараларда вазирлик, Навоий вилояти маҳаллий ҳокимият органлари, DP World компанияси ва “Навоий” эркин иқтисодий зонаси дирекцияси вакиллари иштирок этди.
Хусусан, ЭИЗ фаолияти самарадорлигини ошириш ва ривожлантириш режалари таҳлил қилиниб, ушбу лойиҳани амалга ошириш бўйича навбатдаги тадбирлар келишиб олинди. Устувор вазифалар қаторида “Навоий” ЭИЗ резидентлари сифатида етакчи халқаро компанияларни, жумладан, БААда жойлашган “Jebel Ali” эркин иқтисодий зонасининг йирик ишлаб чиқариш корхоналарини жалб этиш масалалари белгиланди.
Маълумот учун: DP World денгиз ва қуруқ портлар, контейнер терминаллари, саноат парклари ва эркин иқтисодий зоналарнинг дунёдаги энг йирик операторларидан бири ҳисобланади. У «Jebel Ali» порти ва эркин иқтисодий зонаси (БАА), «London Gateway» (Буюк Британия), Циндао (ХХР), Пусан (Жанубий Корея), «Rotterdam World Gateway» (Нидерландия), бошқа порт ва контейнер терминалларини бошқаради. Компания олти қитъадаги 40 та мамлакатда жойлашган 78 та денгиз ва ички терминалларга эга.
