11/Февраль/2021 Таълим
ТОШКЕНТ, 11 февраль. /«Дунё» АА/. Бугун Тошкент фармацевтика институтида (ТФИ) Япониянинг Iryo Sosei университети билан ҳамкорлик тўғрисидаги меморандумни имзолаш маросими бўлиб ўтди, деб хабар бермоқда “Дунё” АА мухбири Музаффар Комилов.
Ҳужжатни Тошкент фармацевтика институти ректори Камол Ризаев ва Iryo Sosei университети проректори Нобутака Тагучи имзолади.
Шунингдек, тадбирда Япониянинг Aoikai тиббиёт корпорациясининг Тошкент шаҳридаги филиали вакиллари, институт профессор-ўқитувчилари ва талабалари иштирок этди.
Япониядан келган меҳмонларга Тошкент фармацевтика институти фаолияти, бу ерда талабалар учун яратилган шароитлар, таълим йўналишлари ҳақида маълумот берилди.
Меморандум 14 йўналишда ҳамкорлик қилишни назарда тутади. Хусусан, ўқитувчилар ва ходимлар, талабалар ва аспирантлар алмашинуви, биргаликда тадқиқотлар ўтказиш, семинарлар ташкил этиш, ўқув материаллари, нашрлар ва бошқа ўқув маълумотларини тарқатиш, қисқа муддатли ўқитиш ва бошқаларни ўз ичига олади.
Ўзбек талабаларини Япония университетида ўқиши билан боғлиқ харажатлар Aoikai корпорацияси томонидан қопланиши таъкидланди. Ўқув курсларини тугатган талабалар Япония фармацевтика компанияларида ишлаш имкониятига эга бўлади.
Нобутака Тагучи Япония тиббиёт соҳаси, Aoikai корпорацияси ва Iryo Sosei университети фаолияти, чет эллик талабалар учун яратилган шароитлар ҳақида батафсил маълумот берди.
Фикр алмашиш жараёнида учрашув иштирокчилари ўзларини қизиқтирган саволларга батафсил жавоб олиш имкониятига эга бўлди.
Шунингдек, япониялик меҳмонларга дори воситаларини яратиш лабораториялари кўрсатилди, замонавий ускуналарда янги дори-дармонларни ишлаб чиқариш жараёни билан таништирилди.
Таъкидлаш жоизки, 1978 йилда ташкил этилган Aoikai тиббиёт корпорацияси бугунги кунда 15 компанияни ўз ичига олади. Уларда 15 минг киши ишлайди. Корпарация 100 дан ортиқ объект, хусусан касалхоналар, қариялар уйлари, университетлар, коллежлар, болалар боғчалари, меҳмонхоналар ва бошқаларга эгалик қилади.
Япония корпорациясининг мақсади даволаш ва профилактика ишларини бирлаштирган ҳолда соғлом ҳаёт учун зарур бўлган юқори сифатли шароитни тақдим этишдан иборатдир.
Iryo Sosei университети 1987 йилда Фукусима префектурасида ташкил этилган бўлиб, Aoikai корпорациясига тегишлидир. Олий ўқув юртида фармацевтика, ҳамширалар тайёрлаш, тиббиёт фанлари ва психология факультетлари мавжуд.
