31/Январь/2023 Экспорт
ПЕКИН, 31 январь. /«Дунё» АА/. 2022 йил сентябрь – декабрь ойлари мобайнида Ўзбекистонда етиштирилган қарийб 2 минг тонна қизил ловия Хитойга экспорт қилинди, деб хабар бермоқда «Дунё» АА мухбири.
Таъкидлаш керакки, сўнгги йилларда Ўзбекистон ҳукумати томонидан олиб борилаётган кенг кўламли савдо-иқтисодий ислоҳотлар, маҳаллий экспортчиларни ҳар томонлама қўллаб-қувватлаш бўйича янгича сиёсат Ўзбекистонда етиштирилган қишлоқ хўжалиги маҳсулотларини дунёнинг исталган нуқтасида топишга имконият яратмоқда, маҳсулотларимиз экспортининг жўғрофияси тобора кенгаймоқда.
Ўзбекистоннинг хорижий давлатлардаги дипломатия ваколатхоналари ва маҳаллий экспортчиларимиз ўртасида йўлга қўйилган янгича ҳамкорлик механизмлари натижаси ўлароқ, халқаро бозорларда ўзбек тадбиркорларининг фаоллиги ортмоқда, жаҳон бозорларида юз бераётган тезкор жараёнлар ва маҳсулотларга бўлган талаблар ҳақида доимий маълумот алмашиш имкониятлари яратилмоқда.
Ана шундай муваффақиятли ҳамкорлик намунаси сифатида яқиндагина Хитой бозорига экспорти йўлга қўйилган қизил ловия бўйича Наманган вилоятидаги “Chust O’rikzor” МЧЖ, Жиззах вилоятидаги “Seven Hills Agro JZ” ва Самарқанд вилоятидаги “Gold Zone Fruit” МЧЖ каби 80 дан ортиқ ўзбек экспортчилари тегишли рухсатномалар олишганини қайд этиш зарур.
Хитой Халқ Республикаси раҳбари Си Цзиньпиннинг 2022 йил сентябрь ойида Ўзбекистон Республикасига давлат ташрифи давомида “Ўзбекистондан Хитойга ўзбек ловиясини экспорт қилиш бўйича назорат, карантин ва фитосанитария талаблари тўғрисидаги” идоралараро баённома имзоланган эди.
