08/Декабрь/2022 Ўзбекистон дунё нигоҳида
ИСЛОМОБОД, 8 декабрь. /«Дунё» АА/. Ўзбекистон элчихонасидан маълум қилишларича, мамлакатимиз пойтахти - Тошкентнинг туристик имкониятларига бағишланган “Salom, Toshkent” номли видеоролик жорий йилнинг 14 ноябрдан бошлаб Покистоннинг инглиз тилидаги марказий янгиликлар телеканали - “PTV WORLD”да ўртача ҳар 1,5 соат вақт оралиғида намойиш этилаётир, деб хабар бермоқда “Дунё” АА мухбири.
Аҳамиятли жиҳати шундаки, мазкур телеканал асосан тезкор янгиликларга ихтисослашган бўлиб, унда хорижий мамлакатларнинг тарғибот роликларини намойиш этиш амалиёти кузатилмайди. Шунга қарамай, Покистон томони Ўзбекистон билан муносабатларнинг стратегик шериклик даражасидан келиб чиққан ҳолда мамлакатимиз пойтахти тўғрисидаги ушбу видеомаҳсулотни мазкур телеканалда намойиш этишга қарор қилди.
