13/Апрель/2020 COVID-19
ҚАРШИ, 13-апрель. /«Дунё» АА/. Қарши шаҳридаги Вилоят кўп тармоқли тиббиёт марказида икки ҳафта давомида карантинда бўлган 77 кишига уйига қайтиш учун рухсат берилди, деб хабар бермоқда «Дунё» АА мухбири вилоят ҳокимлиги манбасига асосланиб.
Бугун, 13 апрель куни 14 кунлик карантиндан сўнг уларга уйга кетишга рухсат берилди. Карантинда бўлганларнинг барчаси Чироқчи туманининг Зум қишлоғидан Вилоят кўп тармоқли тиббиёт марказига олиб келинган эди.
14 кун давомида карантинда бўлган фуқаролардан бир неча бор таҳлиллар олинган ва уларнинг ҳеч бирида коронавирус аниқланмаган. Эндиликда уларнинг барчаси маълум муддат оилавий шифокорлар ва патронаж ҳамширалар назоратида тиббий кузатувда бўлади.
Карантиндан чиққан фуқароларни манзилларига етказиш учун вилоят ҳокимлиги томонидан автобуслар ташкил қилинди.
