01/Февраль/2023 Инвестициялар
ЖИДДА, 1 февраль. /«Дунё» АА/. Мамлакатимиз Бош консуллигида Жидда шаҳридаги йирик тадбиркор Муҳаммад Синди билан учрашув бўлиб ўтди, деб хабар бермоқда «Дунё» АА мухбири.
Мулоқот давомида Ўзбекистонга хорижий инвестицияларни жалб этиш билан боғлиқ масалалар атрофлича муҳокама қилинди.
Учрашув чоғида Саудия вакили Ўзбекистонга амалга оширилаётган кенг кўламли ўзгаришлар, иқтисодиётни либераллаштириш ва ташқи савдони ривожлантиришга йўналтирилган ислоҳотлар, хорижий инвесторлар учун яратилган бизнес қулайликлари ҳақидаги батафсил маълумотлар билан таништирилди.
Муҳаммад Синди Ўзбекистонда амалга оширилаётган ислоҳотларни, хусусан, хорижий сармояларни жалб этиш йўналишидаги эътиборга молик ўзгаришларни юқори баҳолади.
Тадбиркор мамлакатимизда тиббиёт жиҳозлари, автомашина эҳтиёт қисмлари ишлаб чиқариш ва помидорни қайта ишлаш бўйича лойиҳаларга тўғридан-тўғри сармоя киритиши мумкинлигини маълум қилди.
Учрашув якунида амалий ишларни бошлаш мақсадида Ўзбекистоннинг тегишли ташкилотлари билан мулоқотни ташкил этишга келишиб олинди.
