07/Февраль/2023 Таълим
ҚОҲИРА, 7 февраль. /«Дунё» АА/. Тошкент давлат шарқшунослик университети ректори Гулчеҳра Рихсиева кеча Искандария университети ректори Абдулазиз Консова билан учрашув ўтказди, деб хабар бермоқда «Дунё» АА мухбири.
Мулоқот чоғида олий ўқув юртлари тарихи, уларда яратилган шароитлар, кадрлар тайёрлаш тизими тўғрисида маълумот алмашилди. Хорижий тилларни ўқитиш бўйича ҳамкорликда дастурлар яратиш, туризм ва меҳмонхона бизнеси, халқаро иқтисодиёт ва тижорий алоқалар йўналишларида кадрлар тайёрлаш масалаларига эътибор қаратилди.
Томонлар илмий ҳамкорлик ва талабалар алмашинувини йўлга қўйиш, Искандария кутубхонаси билан қўшма тадбирлар ташкил этиш юзасидан келишувга эришди. Тошкент давлат шарқшунослик университети ва Искандария университети ўртасида ҳамкорлик йўналишларини белгилаб берувчи битим имзоланди.
Маълумот ўрнида: Искандария университети милоддан 300 йил муқаддам ташкил этилган Искандария билимлар уйи давомчиси сифатида 1938 йилда ташкил этилган. Олий ўқув юрти таркибида 21 та факультет ва 3 та институт, 12 та шифохона мавжуд. Университетда 200 минг талабалар, жумладан, 13 мингдан ортиқ хорижлик ёшлар таҳсил олади. Шунингдек, олий таълим муассасасининг хорижий филиалларида 50 мингга яқин йигит-қиз билим олмоқда. Университет Мисрдаги иккинчи йирик олий ўқув юрти бўлиб, жаҳондаги нуфузли 1000 та олий таълим муассасалари қаторидан ўрин олган.
