16/Июль/2022 Ҳамкорлик
ТОШКЕНТ, 16 июль. /«Дунё» АА/. Кеча Тошкентда Мустақил Давлатлар Ҳамдўстлиги (МДҲ) Саноат сиёсати бўйича кенгашининг гибрид форматдаги саккизинчи йиғилиши бўлиб ўтди, деб хабар бермоқда «Дунё» АА мухбири.
Йиғилишда Кенгаш аъзолари ҳамда Беларусь, Қозоғистон, Қирғизистон, Россия, Тожикистон, Туркманистон, Ўзбекистон, МДҲ Ижроия қўмитаси, Ҳамдўстлик давлатларининг илмий ва таълим ташкилотлари ҳамда ишбилармон доиралари вакиллари иштирок этди.
Тадбирни Кенгаш раиси, Ўзбекистон иқтисодий ривожланиш ва камбағалликни қисқартириш вазирининг биринчи ўринбосари Саидқаҳҳор Холхўжаев очди ва модераторлик қилди.
МДҲ Ижроия қўмитаси раиси ўринбосари Илҳом Неъматов табрик нутқи билан чиқиш қилди. Унинг таъкидлашича, Кенгаш ташкил этилган кундан бошлаб нисбатан қисқа муддатда кўплаб ишлар амалга оширилди. Ўтган давр мобайнида 7 та йиғилиш ўтказилиб, уларда кимё саноати, нефт-газ машинасозлигини ривожлантириш, табиий газдан мотор ёқилғиси сифатида фойдаланиш каби жуда муҳим масалалар тайёрланиб, МДҲ олий органларига кўриб чиқиш учун тақдим этилди. Илҳом Неъматов Кенгаш иқтисодиётнинг енгил, озиқ-овқат ва тоғ-металлургия саноати, автомобилсозлик, ўрмон хўжалиги каби тармоқларини ривожлантириш, шунингдек, йўл қурилиши учун машина ва ускуналар ишлаб чиқариш ҳамда ушбу соҳалардаги ҳамкорликни кенгайтириш масалаларини ўз мажлисларида МДҲ олий органлари кўриб чиқиш учун тақдим этган ҳолда мунтазам равишда муҳокама қилишни доимий назоратга олиш зарурлигини таъкидлади.
Шунингдек, МДҲ Ижроия қўмитаси раисининг ўринбосари Ўзбекистоннинг Ҳамдўстлик мамлакатлари ўртасидаги ўзаро манфаатли ҳамкорликни ривожлантиришга қўшаётган салмоқли ҳиссасини алоҳида қайд этди. Ўзбекистон вакиллари МДҲ ҳудудида ташкил этилаётган тадбирларда фаол иштирок этиб, давлатлараро алоқаларни кенгайтириш ва чуқурлаштиришга қаратилган конструктив ташаббусларни илгари сурмоқда.
Кенгаш йиғилиши кун тартибига саноатни ривожлантиришнинг кенг кўламли масалалари, жумладан, кимё саноатидаги ҳужжатларни янгилаш, тоғ-кон-металлургия саноатида ҳамкорликни кенгайтириш, электрон ва электротехника ускуналари чиқиндиларини қайта ишлаш соҳасидаги ўзаро ҳамкорлик масалалари киритилган.
Ўзбекистон МДҲга аъзо давлатларнинг саноат кооперациясини ривожлантириш концепцияси ва 2030 йилгача бўлган даврда МДҲга аъзо давлатларнинг саноат кооперациясини ривожлантириш бўйича чора-тадбирлар комплекси лойиҳасини тақдим этди.
Кенгаш аъзолари МДҲга аъзо давлатлар ўртасида 2035 йилгача энергетика соҳасида ҳамкорлик концепцияси лойиҳаси ва уни амалга ошириш бўйича устувор ҳаракатлар режасини ишлаб чиқиш тўғрисидаги маълумотларни эътиборга олди.
2025 йилгача бўлган даврда табиий газдан автомобиль ёқилғиси сифатида фойдаланиш бўйича комплекс чора-тадбирлар ижроси юзасидан батафсил маълумот тақдим этилди.
Кенгаш аъзолари МДҲга аъзо давлатлар ўртасида енгил саноат соҳасида ҳамкорликни ривожлантириш зарурлиги ҳақидаги таклифни қўллаб-қувватлади.
Тасдиқланган ҳужжатлар лойиҳалари Кенгаш томонидан белгиланган тартибда кейинги кўриб чиқиш учун МДҲ Ижроия қўмитасига киритилади.
Ўзбекистон Иқтисодий ривожланиш ва камбағалликни қисқартириш вазирининг биринчи ўринбосари Саидқаҳҳор Холхўжаев навбатдаги муддатга МДҲга аъзо давлатларнинг Саноат сиёсати бўйича кенгаши раиси этиб сайланди.
Кенгашнинг навбатдаги йиғилиши 2023 йилнинг иккинчи ярмида Қирғизистонда ўтказилиши режалаштирилган.
