03/Март/2020 Бухоро - Ислом олами маданияти пойтахти
МАСҚАТ, 3 март. /«Дунё» АА/. Ўмон Султонлигининг ихтисослашган «Вижхат» газетасида Ўзбекистоннинг ижтимоий-маданий ҳаётидаги муҳим воқеа – Ислом ҳамкорлик ташкилотининг Таълим, фан ва маданият масалалари бўйича тузилмаси (ISESCO) томонидан Бухоро – Ислом олами маданияти пойтахти, деб эълон қилингани тўғрисида мақола чоп этилди, деб хабар беради «Дунё» АА мухбири.
Муаллиф мақолада шу муносабат билан Ўзбекистонда жорий йил апрель ойида ўтадиган тадбирга кўрилаётган ҳозирлик ва унинг кўлами ҳақида сўз юритади.
Мазкур материалда, шунингдек, тадбир дастури доирасида «Ўзбекистоннинг ислом олами маданий меросдаги ўрни» ва «Имом Бухорийнинг замонавий илм-фан ривожига қўшган ҳиссаси» мавзуларида халқаро конференциялар ўтказилиши, халқаро илмий-амалий форум ва уста-ҳунармандлар, хаттотлар ижодий ишлари кўргазмалари ташкил этилиши ҳақида маълумот берилади.
