28/Март/2023 Таълим
ТОШКЕНТ, 28 март. /«Дунё» АА/. Кеча Тошкент шаҳрида Ўзбекистон ва Корея Республикаси олий таълим муассасалари ректорлари форуми ўз ишини бошлади, деб хабар бермоқда «Дунё» АА мухбири.
Икки кун давом этадиган мазкур форумда 100 дан ортиқ олий таълим муассасалари раҳбарлари, вазирлик ва идоралар масъуллари иштирок этмоқда.
Форум икки давлат таълим соҳасидаги ҳамкорликни ҳар томонлама кенгайтириш ва янги босқичга олиб чиқишда муҳим платформа вазифасини ўтади. Тадбир университетлар инновацияси ва тўртинчи саноат инқилоби даврида иқтисодий ўсишни таъминлаш учун икки мамлакат ўртасидаги ҳамкорликни йўлга қўйишга бағишланади.
Форумнинг очилиш маросимида Ўзбекистон олий таълим, фан ва инновациялар вазири, академик Иброҳим Абдураҳмонов ҳамда Корея таълим вазирлигининг Глобал таълимни режалаштириш Бюроси бош директори Жи Ёнг Пак сўзга чиқди.
Бугунги кунда Жанубий Кореянинг етакчи университетлари билан таълим ва илмий ҳамкорликнинг бошқа кўплаб йўналишлари бўйича алоқалар ўрнатилди. Хусусан, техник ва муҳандислик фанлари, ахборот, рақамлаштириш ва саноат технологиялари, жумладан, «яшил технологиялар» йўналишларига ихтисослашган Инха, Аджу, Пучон ва Корея халқаро университетлари филиаллари Ўзбекистонда фаолият юритаётгани қайд этилди.
Бундан ташқари, Корея халқаро ҳамкорлик агентлиги (KOICA) турли техник ёрдам дастурлари доирасида Ўзбекистон фуқароларини Жанубий Корея университетларида магистратурада ўқитиш учун стипендиялар ажратмоқда. Ўқитувчи ва мутахассислар учун KOICA томонидан Жанубий Корея сезиларли ютуқларга эришган турли соҳаларда ташкил этилган семинар ва ўқув курслари, айниқса, янги саноат технологиялари, ахборот ва компьютер тизимлари, тиббиёт ва тиббий таълим ва бошқа кўплаб соҳаларни ривожлантиришда Корея тажрибаси ва билимларини ўрганиш муҳимдир.
Мазкур тадбир университет ректорларига ўзаро ахборот алмашиш, тажриба ўрганиш, маҳорат дарслари ва семинарлар ўтказиш, қўшма дастурлар яратиш, қўшма илмий лойиҳаларни ташкил этиш имкониятини тақдим этади. Халқаро форумнинг биринчи куни якуни бўйича қатор ҳамкорлик шартномалари имзоланди. Битимлар асосан икки мамлакат олий таълим муассасалари ўртасида тўғридан-тўғри алоқаларни йўлга қўйишга қаратилади.
Форум икки секциядан иборат бўлиб, улардан бири университетларнинг иқтисодий ўсишга қаратилган инновациялари ва технология соҳаларидаги ташаббусларига бағишланиб, бошқасида икки давлат олий таълим муассасалари ўртасида ҳамкорлик ва алмашинувни ривожлантириш масалалари муҳокама қилинди.
Шунингдек, форум доирасида меҳмонлар пойтахтимиздаги бир қатор олий таълим муассасалари, технопарклар билан танишишлари ҳамда Самарқанд шаҳрига ҳам ташриф буюриши режалаштирилган.