SЕUL, 10-noyabrya. /«Dunyo» AA/. Oliy Majlis Senati raisi Tanzila Narbayeva boshchiligidagi O‘zbekiston parlament delegatsiyasi Koreya Respublikasi Milliy Assambleyasi spikeri Cho Chon Shik taklifiga binoan rasmiy tashrif bilan Seulga bordi, deb xabar bermoqda “Dunyo” AA muxbiri.

Parlamentimiz yuqori palatasi ma’lumotiga ko‘ra, tashrif doirasida Koreya Respublikasi Milliy Assambleyasi spikeri Cho Chon Shik, “Koreya – O‘zbekiston” parlamentlararo hamkorlik bo‘yicha guruh raisi Kim Gyo Xin hamda qator davlat idoralari, ta’lim muassasalari va yirik kompaniyalar rahbarlari bilan uchrashuvlar o‘tkazilishi rejalashtirilgan.

Uchrashuvlarda ikki mamlakat parlamentlararo hamkorligini yanada mustahkamlash, savdo-iqtisodiy, investitsiyaviy, ta’lim, mehnat va innovatsiyalar sohalaridagi aloqalarni kengaytirish masalalarini, sun’iy intellekt va axborot texnologiyalari yo‘nalishlarida o‘zaro hamkorlik istiqbollarini muhokama qilish nazarda tutilgan.