VENA, 10-may. /“Dunyo” AA/. O‘zbekiston elchisi Baxtiyor Ibragimov Avstriyaning Burgenland federal o‘lkasi Qishloq xo‘jaligi palatasi prezidenti Nikolaus Berlakovich hamda “LANSKY, GANZGER, GOETH + Partner” (LGP) xalqaro yuridik firmasi vakili Klaus Vyolfer bilan uchrashdi, deb xabar bermoqda “Dunyo” AA muxbiri.

Suhbat chog‘ida Avstriya qishloq xo‘jaligi sohasiga O‘zbekistondan malakali ishchilarni jalb qilish masalalari muhokama qilindi. Ayniqsa, meva-sabzavotchilik, qishloq xo‘jaligi mahsulotlarini qayta ishlash va vinochilik sohalarida o‘zbekistonlik mutaxassislar uchun ish o‘rinlari yaratish imkoniyatlari ko‘rib chiqildi.

Nikolaus Berlakovich Avstriya O‘zbekiston bilan bu yo‘nalishda amaliy hamkorlikni kengaytirishga qiziqish bildirganini taʼkidladi. Shuningdek, u O‘zbekistonda sut mahsulotlari ishlab chiqarish tajribasi, xususan, Avstriyadan keltirilgan qoramollarni parvarishlash va ko‘paytirish usullarini o‘rganish istagini bildirdi.

Uchrashuv yakunida tomonlar agrar sohada hamkorlikni yana-da rivojlantirish, malakali kadrlar tayyorlash va ularni Avstriya qishloq xo‘jaligi tarmoqlariga jalb etish bo‘yicha muloqotni davom ettirishga kelishib oldi.