05/Yanvar/2023 Eksport
TOSHKENT, 5-yanvar. /“Dunyo” AA/. 2022 yilda O‘zbekiston elektrotexnika sanoati korxonalari tomonidan umumiy qiymati 800,8 million dollardan ortiq bo‘lgan 196 turdagi mahsulotlarni dunyoning 60 mamlakatiga eksport qilindi, deb xabar bermoqda “Dunyo” AA muxbiri.
“O‘zeltexsanoat” uyushmasining Axborot xizmati maʼlumotiga ko‘ra, “GSP+” imtiyozlaridan foydalangan holda Yevropaning Buyuk Britaniya, Fransiya, Germaniya, Ruminiya, Sloveniya, Chexiya, Avstriya va Vengriya davlatlariga, shu bilan birga, Iroq, Livan, Markaziy va G‘arbiy Afrikaning Gana, Kamerun Respublikalariga tarixda birinchi marta elektrotexnika mahsulotlari sotildi.
4 ta xalqaro ko‘rgazmada milliy mahsulotlar uchun alohida maydon ajratildi. Ko‘rgazmalar davomida korxonalar qariyb 50 million dollarlik shartnomalarni imzolashga erishdi.
Eng ko‘p mahsulotlar eksporti Turkiya, Rossiya, Qozog‘iston, Tojikiston, Ozarbayjon hissasiga to‘g‘ri keladi.
O‘tgan yili 14 ta yangi korxona ilk marotaba o‘z mahsulotlarini eksportga chiqardi.
