25/May/2023 Hamkorlik
JENEVA, 25-may. /“Dunyo” AA/. Jahon sog‘liqni saqlash assambleyasining 76-sessiyasi ishida ishtirok etish uchun tashrif bilan Jenevaga borgan sog‘liqni saqlash vaziri Amrillo Inoyatov boshchiligidagi O‘zbekiston delegatsiya vakillari tashqi iqtisodiy aloqalar va tashqi ishlar vaziri Peter Siyyarto boshchiligidagi Vengriya delegatsiya bilan uchrashuv o‘tkazdi, deb xabar bermoqda “Dunyo” AA muxbiri.
Bo‘lib o‘tgan samarali muloqot davomida Vengriya tomoni bilan bir qator kelishuvlarga erishildi, ikki davlat sog‘liqni saqlash sohasi uchun o‘zaro manfaatli takliflar ilgari surildi.
Vengriya sog‘liqni saqlash tizimi vengriyalik mutaxassislarining murakkab kasalliklarni davolashda erishgan yutuqlari, shuningdek, mamlakat klinikalarining zamonaviy diagnostika uskunalari bilan jihozlangani tufayli Yevropa Ittifoqidagi eng yaxshi tizim hisoblanadi.
Har bir insonning sifatli tibbiy xizmatdan foydalanishi uchun zarur shart-sharoitlarni yaratish bilan birga, yana-da samarali sog‘liqni saqlash tizimini yaratish har ikki davlat uchun tibbiyot sohasida ustuvor vazifa ekanligi taʼkidlandi.
Mamlakatlarimiz tibbiyot kadrlarini tayyorlash, tajriba va texnologiyalar almashish, yangi turdagi dori vositalari hamda tibbiy asbob-uskunalarni birgalikda ishlab chiqish kabi sohalarda hamkorlik qilish uchun katta imkoniyatlarga ega.
Shu nuqtai nazardan, tomonlar O‘zbekistonda farmatsevtika va tibbiyot yo‘nalishlarini o‘z ichiga olgan Debretsen universiteti filialini ochish xususida fikr almashdilar.
Shuningdek, Vengriya farmatsevtika kompaniyalari ishtirokida O‘zbekistonda dori vositalari ishlab chiqarish masalalari ko‘rib chiqildi.
Uchrashuv yakunida Budapeshtda O‘zbekiston-Vengriya tibbiyot forumini o‘tkazish bo‘yicha kelishuvga erishildi.
