03/Mart/2020 Buxoro - Islom olami madaniyati poytaxti
MASQAT, 3 mart. /«Dunyo» AA/. O‘mon Sultonligining ixtisoslashgan «Vijxat» gazetasida O‘zbekistonning ijtimoiy-madaniy hayotidagi muhim voqea – Islom hamkorlik tashkilotining Ta’lim, fan va madaniyat masalalari bo‘yicha tuzilmasi (ISESCO) tomonidan Buxoro – Islom olami madaniyati poytaxti, deb e’lon qilingani to‘g‘risida maqola chop etildi, deb xabar beradi «Dunyo» AA muxbiri.
Muallif maqolada shu munosabat bilan O‘zbekistonda joriy yil aprel oyida o‘tadigan tadbirga ko‘rilayotgan hozirlik va uning ko‘lami haqida so‘z yuritadi.
Mazkur materialda, shuningdek, tadbir dasturi doirasida «O‘zbekistonning islom olami madaniy merosdagi o‘rni» va «Imom Buxoriyning zamonaviy ilm-fan rivojiga qo‘shgan hissasi» mavzularida xalqaro konferensiyalar o‘tkazilishi, xalqaro ilmiy-amaliy forum va usta-hunarmandlar, xattotlar ijodiy ishlari ko‘rgazmalari tashkil etilishi haqida ma’lumot beriladi.
