13/Iyul/2022 Vatandoshlarimiz
OLMA-OTA, 13-iyul. /“Dunyo” AA/. O‘zbekiston Bosh konsulxonasi va Tashqi mehnat migratsiyasi agentligi vakolatxonasi xodimlari vatandoshlarimizning mehnat va turmush sharoitlari bilan tanishish maqsadida Olma-otadagi “Kovald” MCHJda bo‘ldi, deb xabar bermoqda “Dunyo” AA muxbiri.
Uchrashuv chog‘ida yurtdoshlarimizga O‘zbekistonda xavfsiz va qonuniy tashqi mehnat migratsiyasini tashkil etish bo‘yicha ko‘rilayotgan chora-tadbirlar hamda xorijiy davlatlarda vaqtinchalik mehnat faoliyatini amalga oshirish bo‘yicha yaratilayotgan imkoniyatlar haqida maʼlumot berildi.
Bundan tashqari, vatandoshlar mamlakatimizning yangi Konstitutsiyaviy qonun loyihasining umumxalq muhokamasi jarayoni bilan tanishdi. Yurtdoshlarimiz ushbu muhim siyosiy tadbirda faol ishtirok etishga chaqirildi.
O‘z navbatida, mehnat migrantlari ish beruvchi tashkilot tomonidan maoshlar o‘z vaqtida to‘lanayotgani, zarur hollarda boshqa masalalarda ham ko‘mak berilayotganini maʼlum qildi.
Uchrashuvdan so‘ng o‘zbek diplomatlari yurtdoshlarimizning mehnat sharoiti, texnika xavfsizligi meʼyorlariga rioya etish qanday taʼminlanayotgani bilan tanishdi va yashash joylarini ko‘zdan kechirdi.
