11/Mart/2022 Ilm-fan
TOSHKЕNT, 11-mart. /«Dunyo» AA/. O‘zbekiston Fanlar akademiyasi fizik olimlari guruhi jahonda ilk bor yangi elementar zarracha mavjudligini eksperimental tarzda ko‘rsatishdi, deb xabar bermoqda «Dunyo» AA muxbiri.
Fanlar akademiyasidan olingan ma’lumotlarga ko‘ra, bir nuklonga 3.4 GeV energiyali karbon yadrolarining karbon yadrolari bilan to‘qnashuvlarining tahlili natijasida ikkita proton va bitta pi-mezondan iborat sakkiz kvarkli tizimda yangi rezonans zarracha aniqlandi.
Kashf etilgan qisqa yashovchi zarrachaning massasi 2118 ± 1 MeV/c2 ga teng.
Kuzatilgan rezonans strukturaning fon taqsimotidan eksperimental oshishi 122 ± 20 hodisani yoki 4.5 standart xatolikni (sigmani) tashkil etdi.
Yangi rezonans zarracha to‘g‘risida olingan natijalar haqida mualliflar tomonidan tayorlangan maqola «World Scientific» xalqaro nashriyot kompaniyasining «Web of Science» va «Scopus» bazalarida indeksiyalangan «International Journal Of Modern Physics E» (Nuclear Physics) nomli ilmiy jurnallarida chop etildi.
Akademik Behzod Yo‘ldoshev ilmiy rahbarligidagi o‘zbek fizik olimlari guruhi hozirgi paytda yangi zarracha kuzatilishi mumkin bo‘lgan yadroviy to‘qnashuvlarga oid boshqa eksperimental ma’lumotlarni tahlil qilishmoqda.
