26/Avgust/2022 Fakt
TOSHKENT, 26 avgust. /“Dunyo” AA/. O‘zbekiston Innovatsion rivojlanish vazirligi huzurida Sunʼiy intellekt bo‘yicha milliy strategiyani rivojlantirish maslahat kengashi tashkil etildi, deb xabar bermoqda “Dunyo” AA muxbiri.
Innovatsion rivojlanish vazirligi maʼlumotiga ko‘ra, Maslahat kengashi Sunʼiy intellekt bo‘yicha milliy strategiyani rivojlantirishga oid takliflarni ishlab chiqish jarayonida jamoatchilik fikrini o‘rganadi. Innovatsion rivojlanish vaziri Ibrohim Abdurahmonov Kengashning faxriy raisi hisoblanadi. Yangi maslahat organiga vazir maslahatchisi Bobur Rahimov boshchilik qiladi.
Kengash doirasida sunʼiy intellektdan foydalangan holda amaliy tajribalar o‘tkazish va ularni imkon qadar qisqa vaqt ichida mamlakat iqtisodiyotiga tatbiq etish uchun tadqiqotchilarni kompaniyalar bilan birlashtiradigan ishchi guruhlar tuziladi.
Kengash ishida xususiy sektor, ilmiy va ekspert doiralari, ommaviy axborot vositalari, jamoat tashkilotlari, taniqli jamoat arboblari ixtiyoriy ravishda ishtirok etishlari mumkin bo‘ladi.
