10/May/2023 Sanalar
TOSHKENT, 10-may. /“Dunyo” AA/. O‘zbekiston tashqi ishlar vaziri Baxtiyor Saidov bugun Ozarbayjon umummilliy yetakchisi Haydar Aliyev tavalludining 100 yilligiga bag‘ishlangan tantanali tadbirda ishtirok etdi, deb xabar bermoqda “Dunyo” AA muxbiri.
«Bugun Haydar Aliyev tavalludining 100 yilligini nishonlash tadbirida qatnashdik, - deb yozdi O‘zbekiston TIV rahbari o‘zining telegram kanalida. - 2022 yilda Toshkentda Ozarbayjon umummilliy yetakchisi sharafiga nomlangan ko‘cha va yodgorlik ochilgan. Biz O‘zbekiston-Ozarbayjon hamkorligining hozirgi holatidan mamnunmiz va uni barcha yo‘nalishlarda yana-da boyitish uchun bor imkoniyatimizni safarbar qilamiz».
Eslatib o‘tamiz, bugun ozarbayjon xalqi va uning xorijdagi do‘stlari muhim sana – buyuk davlat arbobi, dono siyosatchi va atoqli shaxs, O‘zbekiston-Ozarbayjon munosabatlarini rivojlantirish va mustahkamlashga salmoqli hissa qo‘shgan Ozarbayjon Respublikasi Prezidenti Haydar Aliyev tavalludining 100 yilligini nishonlamoqda.
