03/Fevral/2023 Iqtisodiyot
MADRID, 3-fevral. /“Dunyo” AA/. Malakatimiz elchixonasi ko‘magida “O‘zsanoatqurilishmateriallari” uyushmasi raisining o‘rinbosari Bahodir Ismoilov, Ispaniya “ASCER” kafel va sopol pol ishlab chiqaruvchilar uyushmasi prezidenti Visente Manuel Nomdedeu, uyushma ijrochi kotibi Alberto Echavariya va “Gedepsa” promouterlik-konsalting kompaniyasi prezidenti Alexandro Pastrana o‘rtasida onlayn-muloqot tashkil etildi, deb xabar bermoqda “Dunyo” AA muxbiri.
Uchrashuvda, shuningdek, “O‘zsanoatqurilishbank” ATB mutasaddilari ham qatnashdi.
Muzokaralarda O‘zbekistonda “ASCER” bilan hamkorlikda kaolindan tayyor mahsulotlar ishlab chiqarish bo‘yicha klaster tashkil etish loyihasini hayotga tadbiq etish masalasi muhokama qilindi. Ispaniya sopol plitkalar ishlab chiqaruvchi kompaniyalari va O‘zbekiston ishlab chiqaruvchilari o‘rtasidagi hamkorlik aloqalarini yo‘lga qo‘yish bo‘yicha fikr almashildi.
Mamlakatimiz delegatsiyasining joriy yil fevral oyida Ispaniyaga rejalashtirilayotgan amaliy safari dasturi ko‘rib childi. O‘zbekiston vakillari safar chog‘ida “Azteca”, “Porselanosa”, «Grespana SA» kabi kompaniyalar rahbarlari bilan muzokaralar o‘tkazishi nazarda tutilmoqda.
Maʼlumot uchun: “ASCER” 1977 yilda tashkil etilgan, bosh qarorgohi Kastellon de la Plana shahrida (Valensiya) joylashgan. Uyushma sohaning 100 dan korxonalarini birlashtirgan. Tuzilma tarkibidagi kompaniyalar Ispaniyaning ushbu yo‘nalishdagi ishlab chiqarish quvvatining taxminan 95 foizini qamrab olgan.
