Uz / Ўз Ru En

Toshkent

24/Iyun/2022   Prezident

O‘zbekiston Prezidenti Barqaror rivojlanish maqsadlariga erishishda keng ko‘lamli xalqaro hamkorlikka chaqirdi

TOSHKENT, 24 iyun. /“Dunyo” AA/. O‘zbekiston Prezidenti Shavkat Mirziyoyev Xitoy Raisi Si Szinpinning taklifiga binoan bugun “BRIKS plyus” formatidagi Global taraqqiyot masalalari bo‘yicha yuqori darajadagi muloqotda ishtirok etdi, deb xabar qilmoqda “Dunyo” AA muxbiri.


Davlatimiz rahbari matbuot xizmati maʼlumotiga ko‘ra, Xitoy tomoni raisligida o‘tgan onlayn-forumda dunyoning 18 mamlakatidan davlat va hukumat rahbarlari qatnashdi. O‘zbekiston va Xitoy yetakchilari bilan bir qatorda Argentina Prezidenti Alberto Fernandes, Indoneziya Prezidenti Joko Vidodo, Janubiy Afrika Respublikasi Prezidenti Siril Ramafosa, Misr Prezidenti Abdulfattoh as-Sisi, Rossiya Prezidenti Vladimir Putin, Eron Prezidenti Ibrohim Raisiy, Qozog‘iston Prezidenti Qasim-Jomart Toqayev, Hindiston Bosh vaziri Narendra Modi, Braziliya vitse-prezidenti Gamilton Mourau, shuningdek, Kambodja, Malayziya, Tailand, Fidji va Efiopiya hukumatlari rahbarlari ishtirok etdi.

Xavfsizlik va barqarorlik borasidagi ko‘p tomonlama hamkorlik, savdo va investitsiyalar, “yashil” iqtisodiyot, yuqori texnologiyalar va innovatsiyalar, raqamlashtirish, transport va logistika, ekologiya, gumanitar sohalarda amaliy sheriklikni kengaytirish masalalari ko‘rib chiqildi.

O‘zbekiston Prezidenti o‘z nutqida “BRIKS plyus” formatidagi muloqotning Barqaror rivojlanish kun tartibini ilgari surishda inklyuziv sheriklik uchun zarur platforma sifatida alohida ahamiyatga ega ekanini taʼkidladi.

Bugungi dunyo qator tahlikali jarayonlar bilan kechayotgan chuqur transformatsiya davrida yashayotgani - xalqaro keskinlik tobora kuchayib borayotgani va tizimli iqtisodiy inqiroz belgilari namoyon bo‘layotgani qayd etildi.

Ishtirokchilarning eʼtibori “Inson manfaatlari – hamma narsadan ustun” degan tamoyil asosida islohotlarni amalga oshirishni izchil davom ettirayotgan Yangi O‘zbekiston bunday sharoitda keng ko‘lamli hamkorlik, shu jumladan “Janub-Janub” formatidagi sheriklik  uchun ochiq ekaniga qaratildi.

Jahon iqtisodiyotida kuzatilayotgan inqirozli holatlarni yengib o‘tish maqsadida savdodagi to‘siqlarni bartaraf etish, yangi ishlab chiqarish va savdo-logistika zanjirlarini yaratish, sanoat kooperatsiyasi bo‘yicha loyihalarga investitsiyalar jalb etish va infratuzilmani modernizatsiya qilish, texnologiyalar transferi va innovatsiyalarni joriy etish, sunʼiy intellekt, raqamlashtirish, biotexnologiyalar, vaksinalar ishlab chiqish sohasidagi hamkorlikni yana-da kengaytirish bo‘yicha muvofiqlashtirilgan chora-tadbirlarni qabul qilish muhimligi taʼkidlandi.

Qo‘shma loyiha va tashabbuslarni ilgari surish maqsadida “BRIKS plyus” ishbilarmon doiralari forumini yo‘lga qo‘yish taklif etildi.

O‘zbekiston Prezidenti transport-kommunikatsiyalar sohasidagi bog‘liqlikni kuchaytirish hamda “Shimol – Janub” va “G‘arb – Sharq” transkontinental yo‘nalishlariga mintaqamizni jalb etish tashabbusini ilgari surdi.

BMTning bozorlarda oziq-ovqat mahsulotlarining barqaror va ochiq harakatini taʼminlash bo‘yicha daʼvati qo‘llab-quvvatlandi.

Kambag‘allikni qisqartirish va tadbirkorlikni qo‘llab-quvvatlash sohasida dasturlarni amalga oshirish, iqlim o‘zgarishlari va inson salohiyatini rivojlantirish bo‘yicha ko‘p tomonlama hamkorlikni faollashtirish sheriklikning muhim yo‘nalishlaridan biri sifatida ko‘rsatib o‘tildi. Mamlakatimiz Universitetlar ligasi va Tarmoqli universitet kabi BRIKS dasturlarida ishtirok etishdan, shuningdek, professional taʼlim va yoshlarga doir siyosat sohasida hamkorlikni kengaytirishdan manfaatdor ekani taʼkidlandi.

O‘zbekiston tomoni Shanxay hamkorlik tashkiloti raisi sifatida BRIKS va SHHTning o‘zaro amaliy hamkorlik mexanizmlarini ishlab chiqishni ham taklif etdi.

So‘zining yakunida Prezident Shavkat Mirziyoyev “BRIKS plyus” shaklidagi muloqotning o‘tkazilishi tezkor ravishda umumiy tahdidlarning oldini olish, global barqarorlik va mamlakatlarimizning izchil taraqqiyotini taʼminlash yo‘lida ishtirokchilarning intilishlari mushtarakligini yana bir bor namoyish etganini taʼkidladi.

Boshqa xorijiy yetakchilarning nutqlarida ham global sheriklikni va 2030 yilga qadar Barqaror rivojlanish sohasidagi kun tartibini ilgari surishda o‘zaro manfaatli hamkorlikni kengaytirish muhimligi to‘g‘risida fikrlar bildirildi. Iqtisodiyot, innovatsiyalar va “yashil” texnologiyalar, savdo, transport va kommunikatsiyalar, ekologiya, boshqa ustuvor sohalardagi ko‘p tomonlama muloqotning istiqbolli yo‘nalishlari qayd etildi.

 

 

Mavzuga oid

Yoshlar ishlari agentligining vakolatlar...

O‘zbekiston Prezidenti «Yoshlar bilan ishlash tizimi takomillashtirilishi munosabati bilan...

O‘zbekistonda ko‘chma savdoning yangi ta...

O‘zbekiston Prezidenti «Ko‘chma savdo faoliyatiga axborot texnologiyalarini joriy etish va...

Muloqotlar samarali bo‘ldi

Tojikiston Prezidenti Emomali Rahmonning mamlakatimizga rasmiy tashrifi yakunlandi

So`nggi yangiliklar