Uz / Ўз Ru En

Toshkent

06/Dekabr/2021   Prezident

O‘zbekiston Prezidenti: Bugun O‘zbekiston-Qozog‘iston hamkorligining ittifoqchilik munosabatlari darajasiga ko‘tarilgani, bu birodar xalqlarimizning uzoq muddatli manfaatlaridan kelib chiqib, ularga to‘liq mos keladi

 TOSHKENT, 6 dekabr. /“Dunyo” AA/. O‘zbekiston Prezidentining Qozog‘istonga davlat tashrifining asosiy tadbirlari yakunlanganidan so‘ng ikki davlat rahbarlari ommaviy axborot vositalari vakillari uchun brifing o‘tkazdilar, deb xabar bermoqda “Dunyo” AA muxbiri.


Mamlakatimiz rahbari matbuot xizmati maʼlumotiga ko‘ra, Prezidentlar har doimgidek ochiq, ishonchli va ishchan muhitda o‘tgan muzokaralar natijalaridan mamnunligini bildirdilar.

Xususan, muzokaralarda O‘zbekiston bilan Qozog‘iston o‘rtasidagi ko‘p qirrali, o‘zaro manfaatli hamkorlikni ikki tomonlama va mintaqa kun tartibidagi barcha yo‘nalishlarda yana-da rivojlantirish masalalari batafsil ko‘rib chiqildi.

Shavkat Mirziyoyev o‘z bayonoti avvalida Qozog‘iston xalqini mustaqillikning 30 yilligi bilan yana bir bor tabrikladi.

Keyingi yillarda do‘stlik, yaxshi qo‘shnichilik va strategik sheriklikka asoslangan O‘zbekiston-Qozog‘iston munosabatlarida ulkan o‘zgarishlar ro‘y berayotgani taʼkidlandi.

O‘zbekiston yetakchisi bugun tarixiy qaror qabul qilinib, ikki tomonlama hamkorlik ittifoqchilik munosabatlari darajasiga ko‘tarilgani, bu birodar xalqlarimizning uzoq muddatli manfaatlaridan kelib chiqib, ularga to‘liq mos ekanini qayd etdi.

- O‘zbekiston va Qozog‘iston hamkorligi zamirida bir-birimizni to‘ldirib turish borasidagi ulkan salohiyatdan foydalanishga intilish ham mavjud. Biz saʼy-harakatlarimizni birlashtirish va yangi o‘sish nuqtalarini izlash niyatidamiz, - dedi Shavkat Mirziyoyev.

Ikki tomonlama hamkorlikning ustuvor yo‘nalishi – savdo-iqtisodiy hamkorlikda erishilayotgan natijalar mamnuniyat bilan qayd etildi. Joriy yil boshidan o‘zaro savdo hajmi qariyb 40 foizga oshib, bu borada rekord ko‘rsatkich – 4 milliard dollarga erishish kutilmoqda. Muzokaralar chog‘ida tovar ayirboshlashni kelgusi yilda 5 milliardga, uzoq muddatli istiqbolda esa 10 milliardga yetkazish maqsad qilindi.

Qishloq xo‘jaligi mahsulotlarini yetkazib berishni kengaytirish maqsadida tomonlar agroklasterlar, ulgurji-taqsimlash va logistika markazlarini tashkil etishga, “Agroekspress” loyihasini ilgari surishga kelishib olganliklari ko‘rsatib o‘tildi.

Sanoat kooperatsiyasi va hududlararo hamkorlik sohasida erishilgan kelishuvlar muhim ahamiyatga ega. Bu borada muvaffaqiyatli misollar mavjudligi, jumladan, Kostanayda avtomobillar, avtobuslar va qishloq xo‘jaligi texnikasini yig‘ish, Turkiston va Chimkentda to‘qimachilik va elektrotexnika mahsulotlari ishlab chiqarish yo‘lga qo‘yilgani taʼkidlandi.

O‘zbekistonda sanoat, energetika, kimyo, qurilish, bank va boshqa sohalarda qo‘shma loyihalar amalga oshirilmoqda. Tashrif arafasida o‘tkazilgan ishbilarmonlik tadbirlari yakunida qiymati 6 milliard dollarga yaqin bo‘lgan yangi investitsiya va savdo kelishuvlari imzolandi.

– Bunday ko‘rsatkichlar avval bo‘lmagan. Qolaversa, barchasi qatʼiy kelishuvlar, ular istiqbolga yaxshi zamin yaratadi, - dedi Shavkat Mirziyoyev.

Transport va tranzit sohasi salohiyatini kengaytirish maqsadida “Uchquduq-Qizilo‘rda” avtomobil va temir yo‘llari, “Turkiston-Chimkent-Toshkent” yuqori tezlikda harakatlanishga mo‘ljallangan temir yo‘lini barpo etish loyihalarini amalga oshirish rejalashtirilgan.

Tomonlar “yashil” energetika loyihalarini faol ilgari surishga, eng yangi suv tejaydigan texnologiyalarni joriy qilish, Orolbo‘yida daraxtzorlar yaratish borasida birgalikda ishlash va xalqaro donorlar bilan hamkorlik qilishga kelishib oldilar.

Brifingda madaniyat, fan va taʼlim, sog‘liqni saqlash va turizm sohalarida erishilgan kelishuvlar ham qayd etildi.

- Bugungi murakkab va ziddiyatli zamonda odamlar ongi va qalbiga, ayniqsa yosh avlodga ijobiy taʼsir ko‘rsatuvchi madaniyat va maʼnaviyatning ahamiyati ortib bormoqda, - dedi Shavkat Mirziyoyev.

Shu munosabat bilan muzokaralarda Qozog‘istonda O‘zbekiston yili va O‘zbekistonda Qozog‘iston yili tadbirlarini muntazam ravishda o‘tkazib borish yuzasidan kelishuvga erishildi. Kelgusi yilda yurtimizda birinchi Yoshlar kongressi hamda Ijodiy va ilmiy ziyolilar forumi tashkil etiladigan bo‘ldi.

Qayd etilganidek, O‘zbekistonda sakkiz yuz mingdan ziyod qozoq millatiga mansub fuqarolar istiqomat qilmoqda. Ular milliy madaniyati, tili va anʼanalarini rivojlantirishi uchun barcha sharoitlar yaratilgan. To‘rt yuzga yaqin maktabda o‘qitish qozoq tilida olib borilmoqda.

Mana o‘ttiz yildirki, O‘zbekistonda Qozoq milliy madaniyat markazi va uning sakkizta hududiy bo‘linmalari faol ishlab turibdi.

- Qozoq yurtdoshlarimiz orasida O‘zbekiston Qahramoni yuksak unvoniga va boshqa davlat mukofotlariga sazovor bo‘lganlar, senator va deputatlar, vazir va generallar, yirik korxonalar rahbarlari borligidan faxrlanamiz, - dedi Shavkat Mirziyoyev.

Davlat rahbarlari O‘zbekiston va Qozog‘iston o‘rtasida diplomatik munosabatlar o‘rnatilganining o‘ttiz yilligini kelgusi yilda keng nishonlash maqsadida tegishli dastur qabul qilishga kelishib oldilar.

Mintaqaviy va xalqaro maydondagi hamkorlik masalalariga to‘xtalar ekan, O‘zbekiston yetakchisi Markaziy Osiyo davlatlari rahbarlarining Maslahat uchrashuvidek samarali platformani yaratishga muvaffaq bo‘lingani, uning doirasida umumiy uyimizni kompleks rivojlantirish yo‘llari belgilanayotganini alohida qayd etdi.

Muzokaralarda mintaqamizda xavfsizlik va barqarorlikka tahdidlarga, eng avvalo qo‘shni Afg‘onistondagi vaziyatdan kelib chiqqan holda qarshi kurashish masalalariga alohida eʼtibor qaratildi. Bu borada O‘zbekiston va Qozog‘iston pozitsiyalari to‘liq mos ekani tasdiqlandi.

Mamlakatimiz Qozog‘istonning Osiyoda hamkorlik va ishonch choralari bo‘yicha kengash hamda Mustaqil Davlatlar Hamdo‘stligiga raisligi doirasidagi tashabbuslarni qo‘llab-quvvatlaydi. Qozog‘iston esa O‘zbekistonning Shanxay hamkorlik tashkiloti va Iqtisodiy hamkorlik tashkilotiga raisligi doirasidagi faoliyatini qo‘llab-quvvatlaydi.

– Ushbu tashrif doirasida salmoqli hujjatlar to‘plamini imzoladik. Ishonchimiz va sherikligimiz juda yuksak darajaga chiqqanidan, birgalikda harakat qilib, har tomonlama ko‘makdosh bo‘lishga tayyor ekanimizdan dalolat beruvchi Ittifoqchilik munosabatlari to‘g‘risidagi deklaratsiya ular orasida eng asosiysi. Biz ikki qardosh xalqlarning ravnaqi yo‘lida ko‘p asrlik do‘stlik, yaxshi qo‘shnichilik va keng ko‘lamli hamkorlikni mustahkamlashning qatʼiy tarafdorimiz, - dedi O‘zbekiston Prezidenti.

Prezident Qasim-Jomart Toqayev ham keng doiradagi masalalar yuzasidan fikr almashilgan muzokaralar yakunidan mamnunligini bildirdi.

Davlatimiz rahbari Qozog‘iston Prezidentini o‘ziga qulay vaqtda tashrif bilan O‘zbekistonga kelishga taklif qildi.

 

 

Mavzuga oid

O‘zbekiston va Qozog‘iston kosmik fazoni...

O‘zbekiston Prezidenti «Xalqaro shartnomani tasdiqlash to‘g‘risida»gi qarorni imzoladi...

O‘zbekiston Prezidenti Rossiyaning “LUKO...

O‘zbekiston Respublikasi Prezidenti Shavkat Mirziyoyev bugun “LUKOYL” kompaniyasi preziden...

Birinchi yarim yillik yakunlariga ko‘ra ...

Joriy yilning birinchi yarmida O‘zbekiston yalpi ichki mahsulotining o‘sishi 6,2 foizni t...

So`nggi yangiliklar