Uz / Ўз Ru En

Toshkent

15/Noyabr/2021   Prezident

O‘zbekiston Prezidentiga poytaxtimizning transport infratuzilmasini rivojlantirishga oid loyihalar taqdim etildi


 TOSHKENT, 15 noyabr. /“Dunyo” AA/. Prezident Shavkat Mirziyoyev bugun Toshkent shahrining transport infratuzilmasini rivojlantirishga oid loyihalar taqdimoti bilan tanishdi, deb xabar bermoqda “Dunyo” AA muxbiri davlatimiz rahbari maʼlumotiga tayanib.

Mamlakatimiz taraqqiy etgani sari shaharlar har tomonlama o‘sib bormoqda. Poytaxtimizda ham zamon talablaridan kelib chiqib, yangi yo‘l va ko‘priklar qurilmoqda, transport yo‘nalishlari kengaytirilmoqda.

So‘nggi yillarda Toshkent shahrida yangi metro yo‘nalishlari qurilib, aholi uchun katta qo‘layliklar yaratildi. Toshkent metropolitenini yana-da rivojlantirish maqsadida “Buyuk ipak yo‘li” bekatidan Toshkent traktor zavodi dahasigacha yerosti yo‘li hamda yerusti halqa metrosining ikkinchi bosqichini amalga oshirish rejalashtirilmoqda.

Taqdimotda shu boradagi loyiha takliflari ko‘rib chiqildi. Masalan, yangi yerosti yo‘lini Mirzo Ulug‘bek ko‘chasi yoki Buyuk ipak yo‘li ko‘chasi orqali olib o‘tish ustida ishlanmoqda. Dastlabki hisob-kitoblarga ko‘ra, birinchi holatda yo‘l uzunligi 8,6 kilometr, kunlik yo‘lovchilar soni 62 ming bo‘ladi. Ikkinchi variantda esa masofa salkam 8 kilometr bo‘lib, kuniga 55 ming kishiga xizmat ko‘rsatilishi mumkin. Qurilish ishlari besh yilga mo‘ljallangan.

Yerusti metrosining ikkinchi bosqichi ham muhim loyiha. Unga ko‘ra, Qo‘yliq dahasidan Sergeli yo‘lining 5-bekatigacha 11 kilometrdan ziyod estakada quriladi. Bekatlar soni yettita bo‘lishi, kuniga 38 ming yo‘lovchi tashilishi kutilmoqda.

Yana bir loyihaga ko‘ra, Bobur ko‘chasidan Islom Karimov nomidagi Toshkent xalqaro aeroportiga olib boruvchi yo‘l o‘tkazgichi kengaytirilib, yonida halqa shaklida aylanma ko‘prik qurish ko‘zda tutilgan.

Taqdimotda ushbu loyihalarning texnik-iqtisodiy masalalari muhokama qilinib, davlatimiz rahbari loyihalarni qulaylik, xavfsizlik va sifat jihatidan takomillashtirish bo‘yicha tavsiyalar berdi.

Mavzuga oid

O‘zbekiston va Vengriya yetakchilari ikk...

Bugun Ko‘ksaroy qarorgohida oliy darajadagi O‘zbekiston-Vengriya muzokaralari tor doirada ...

O‘zbekiston Prezidenti turizm, shahar in...

O‘zbekiston Respublikasi Prezidenti Shavkat Mirziyoyev bugun turizm, shahar infratuzilmas...

O‘zbekiston Prezidenti: Hozirgi zamonga ...

Prezident Shavkat Mirziyoyev bugun Andijon viloyati Izboskan tumanidagi Urganji mahallasid...

So`nggi yangiliklar