28/Noyabr/2022 TIV yangiliklari
TOSHKENT, 28-noyabr. /“Dunyo” AA/. O‘zbekiston Prezidentining Afg‘oniston bo‘yicha maxsus vakili Ismatulla Ergashev kecha Ar-Riyod shahrida Saudiya Arabistoni tashqi ishlar vazirining birinchi o‘rinbosari Valid al-Xarijiy bilan muzokaralar o‘tkazdi, deb xabar qilmoqda “Dunyo” AA muxbiri.
TIV maʼlumotiga ko‘ra, suhbat chog‘ida ikki tomonlama hamkorlikning hozirgi darajasi, xususan, Afg‘onistonning iqtisodiy tiklanishiga ko‘maklashish masalasi muhokama qilindi.
Valid al-Xorijiy O‘zbekistonning Afg‘oniston yo‘nalishidagi saʼy-harakatlarini yuqori baholab, eng dolzarb va o‘z vaqtidagi saʼy-harakatlarini taʼkidladi. Bunda O‘zbekiston tomonidan Afg‘onistonda Termiz – Mozori-Sharif – Kobul – Peshovar yo‘nalishi bo‘ylab temir yo‘l qurish kabi yirik infratuzilma loyihasini amalga oshirish bo‘yicha amalga oshirilayotgan amaliy qadamlarga alohida eʼtibor qaratildi.
Shu bilan birga, tomonlar mamlakatning yangi hokimiyat organlari tomonidan xalqaro hamjamiyatning asosiy talablari – keng vakillikka asoslangan hukumat yaratish, insonning asosiy huquqlari, jumladan, ayollar va qizlarni, shuningdek, mamlakatning milliy ozchiliklarini hurmat qilish kabi muhim talablarni amalga oshirish zarurligini taʼkidladi.
Tomonlar Afg‘onistonni og‘ir gumanitar inqirozdan olib chiqish, shuningdek, mamlakat milliy iqtisodiyotini bosqichma-bosqich tiklash masalasida jahon hamjamiyatining kelishilgan va jamoaviy harakatlari zarurligini qayd etdi.
Eslatib o‘tamiz, O‘zbekiston Prezidentining Afg‘oniston bo‘yicha Maxsus vakili Ismatulla Ergashev bundan avvalroq Saudiya Arabistoni Tashqi ishlar vazirligining Siyosiy masalalarni rejalashtirish bosh boshqarmasi boshlig‘i o‘rinbosari - Afg‘oniston bo‘yicha maxsus guruhi rahbari Abdulla bin Holid bin Saud al Kabir bilan muzokaralar o‘tkazdi.
