10/Yanvar/2022 O’zbekiston dunyo nigohida
QOHIRA, 10 yanvar. /“Dunyo” AA/. Misrning “Al-Diplomasi” nashrida «Fitch Ratings» O‘zbekistonda turli jabhalarda iqtisodiy islohotlarni hayotga tadbiq etish borasida erishilgan jadal taraqqiyotni eʼtirof etdi» sarlavhali maqola eʼlon qilindi, deb xabar bermoqda “Dunyo” AA muxbiri.
Misr nashri «Fitch Ratings» agentligi maʼlumotlariga tayangan holda 2017 yil sentyabr oyida O‘zbekistonda valyuta nazoratini liberallashtirish yo‘lga qo‘yilganidan so‘ng mamlakat iqtisodiyoti va siyosatida salmoqli o‘zgarishlar ro‘y berganini taʼkidlaydi.
«Turli jabha va tashkilotlarda davlat manbaalaridan moliyalashtirishga qaramlikni pasaytirish va moliyalashtirishda bozor tamoyillaridan qo‘llanilishiga o‘tish borasida banklar va bir qancha nomoliyaviy korporatsiyalar salmoqli taraqqiyotga erishdi, - deb yozadi “Al-Diplomasi”. – Masalan, elektr energiyasi ishlab chiqarish singari va iqtisodiyotning boshqa qator muhim jabhalariga jalb etilgan sarmoyalar hajmining oshirilishi hisobidan o‘sishning yuqori surʼatlariga erishilmoqda. Bunday islohotlar sug‘urta tizimi va boshqa sohalarning faol rivojlanishiga ham ko‘maklashadi».
Maqola intihosida «Fitch Ratings» reyting agentligi hisobotida davlat tomonidan mamlakatning kredit siyosati boshqarilishi islohotlari ustida ish olib borilayotgani maʼlum qilingani ham o‘quvchilarning eʼtiboriga havola etilgan. Unda alohida qayd etilganidek, «korporativ boshqaruv, shaffoflik va hisobdorlik, ularning xalqaro andozalarga yaqinlashtirilishi singari omillar O‘zbekiston kompaniyalari uchun eng muhim vazifa hisoblanadi».
