14/Aprel/2020   Iqtisodiyot

O‘zbekistonda narx-navo barqarorligi raqamlarda aks etmoqda

TOSHKENT, 14-aprel. /“Dunyo” AA/. Mamlakatimizda koronavirus pandemiyasi tufayli e’lon qilingan karantin davrida davlat soliq xizmati organlari tomonidan zarur oziq-ovqat va tibbiy-gigiyenik mahsulotlar narxining asossiz oshirilishining oldini olishga qaratilgan izchil chora-tadbirlar amalga oshirilyapti, deb xabar bermoqda “Dunyo” AA muxbiri.

Bundan tashqari 7/24 tartibida ishlovchi Davlat soliq qo‘mitasi “Ishonch telefoni” va “Qo‘ng‘iroqlar markazi” (Call-center)ga aholidan kelayotgan murojaatlar nazoratga olinib, ular asosida o‘rganish va tegishli nazorat tadbirlari olib borilmoqda.

Davlat soliq qo‘mitasi taqdim etgan ma’lumotlarga ko‘ra, “Ishonch telefoni” va “Qo‘ng‘iroqlar markazi” (Call-center)ga kelib tushayotgan murojaatlar soni kamayib bormoqda.

Masalan, o‘tgan hafta chorshanba va payshanba (8-9 aprel) kunlari 980 ta murojaat kelib tushgan bo‘lsa, shanba va yakshanba (11-12 aprel) kunlari ular soni 761 tani tashkil etdi.

Samarqand, Qashqadaryo va Toshkent viloyatlari aholisi boshqa hududlarga nisbatan ko‘proq murojaat qilgan.