Uz / Ўз Ru En

Toshkent

12/Avgust/2022   Ta'lim

O‘zbekistonlik talabalar Kuvayt universitetida qabul qilindi

AL-KUVAYT, 12-avgust. /“Dunyo” AA/. O‘zbekiston Respublikasining Kuvayt Davlatidagi elchixonasida amaliyot o‘tayotgan Jahon iqtisodiyoti va diplomatiya universiteti hamda Toshkent Davlat sharqshunoslik universiteti talabalari Ramzbek Otabekjonov va Xayrulloh Isroilov Kuvayt universiteti ijtimoiy fanlar fakulteti siyosatshunoslik kafedrasining mudiri, Ko‘rfaz arab davlatlari hamkorlik kengashi Oliy Maslahatlashuv kengashi aʼzosi, professor Heyla al-Mekeymi tomonidan qabul qidindi, deb xabar bermoqda “Dunyo” AA muxbiri.


Heyla al-Mekeymi bir necha bor O‘zbekistonda bo‘lib, 2016 yilgi Prezident saylovlarida xalqaro kuzatuvchi sifatida, 2017 yilg 10-11 noyabr kunlari Samarqandda BMT shafeligida o‘tkazilgan «Markaziy Osiyo: bir o‘tmish va bir kelajak, barqaror rivojlanish va o‘zaro farovonlik uchun hamkorlik» hamda 2019 yil 19-20 fevral kunlari Toshkentda “Markaziy Osiyoda o‘zaro mushtaraklik: tahdidlar va yangi imkoniyatlar” mavzusiga bag‘ishlab o‘tkazilgan xalqaro konferensiyalarda ishtirok etganini yodga oldi.

Professor o‘zbekistonlik talabalarga Kuvayt universiteti va Ko‘rfaz arab davlatlari hamkorlik kengashi faoliyati to‘g‘risidagi maʼlumotlarni o‘rtoqlashdi. O‘z navbatida, talabalar ham O‘zbekistondagi yoshlarga oid davlat siyosati va Prezidentimiz Sh.M.Mirziyoyev tomonidan yoshlarga qaratilayotgan eʼtibor va ular uchun yaratilayotgan keng imkoniyatlar haqida so‘zlab berdilar. Shu bilan birga, o‘zlari tahsil olayotgan Jahon iqtisodiyoti va diplomatiya universiteti va Toshkent Davlat sharqshunoslik universiteti hamda diplomatik vakolatxonadagi amaliyotlari to‘g‘risida ham to‘xtalishdi.

Heyla al-Mekeymi o‘zining ilmiy faoliyatida Markaziy Osiyo, xususan, O‘zbekiston alohida o‘rin tutishini taʼkidlar ekan, mamlakatimizda so‘nggi yillarda amalga oshirilayotgan islohotlarni va Prezidentimizning Markaziy Osiyoda tinchlik va barqarorlikni taʼminlashga, mintaqa davlatlari bilan do‘stona va ahil qo‘shnichilik munosabatlarini mustahkamlashga hamda Afg‘onistondagi vaziyatni hal qilishga qaratilgan saʼy-harakatlarini ijobiy baholadi. Shu o‘rinda, joriy yil 25 – 26 iyul kunlari Toshkentda “Afg‘oniston: xavfsizlik va iqtisodiy rivojlanish” mavzusida bo‘lib o‘tgan xalqaro konferensiyaning natijalariga alohida eʼtiborni qaratdi. 

Suhbat davomida professor Kuvayt universiteti bilan Jahon iqtisodiyoti va diplomatiya universiteti hamda Toshkent Davlat sharqshunoslik universiteti o‘rtasida siyosatshunoslik sohasidagi hamkorlik aloqalarini rivojlantirish muhimligini qayd etar ekan, bu yo‘nalishda O‘zbekistonning elchixonasi bilan oxirgi yillarda samarali ishlar amalga oshirilayotganligini alohida taʼkidladi. U joriy yil oktyabr-noyabr oylarida Kuvayt universiteti delegatsiyasi tarkibida O‘zbekistonga borishni hamda safar doirasida Jahon iqtisodiyoti va diplomatiya universiteti va Toshkent Davlat sharqshunoslik universiteti professor-o‘qituvchilari va talabalariga maʼruzalar o‘qishni rejalashtirilayotganini bildirdi.

Uchrashuv so‘ngida Heyla al-Mekeymi o‘zbekistonlik talabalarga xalqaro munosabatlar va siyosatshunoslik sohasidagi ilmiy faoliyatlari bo‘yicha o‘z tavsiyalarini bildirar ekan, kelajakdagi faoliyatlarida muvaffaqiyatlar tiladi.

Mavzuga oid

Farg‘ona viloyati va Osaka prefekturasi ...

Farg‘ona viloyati hokimining o‘rinbosari Fayzullajon Qosimov boshchiligidagi delegatsiya a...

Sankt-Peterburgda tahsil olayotgan bir g...

Sankt-Peterburg shahridagi oliy ta’lim muassasalarida tahsil olayotgan bir guruh o‘zbekist...

O‘zbekiston va Polshaning statistika taʼ...

Statistika davlat qo‘mitasi huzuridagi Kadrlar malakasini oshirish va statistika tadqiqotl...

So`nggi yangiliklar