03/Fevral/2023 Ta'lim
SEUL, 3-fevral. /“Dunyo” AA/. O‘zbekiston elchixonasi xodimlarining Koreya universiteti Ijtimoiy xizmatlarni tashkil etish tashkiloti direktori, professor Yeur Du Son bilan uchrashuvi bo‘lib o‘tdi, deb xabar bermoqda “Dunyo” AA muxbiri.
Uchrashuv davomida Koreya universiteti prezidenti Chun Djin Tek boshchiligidagi delegatsiyaning joriy yil 6-10 fevral kunlari O‘zbekistonga uyushtiriladigan safari muhokama qilindi.
Tashrifdan ko‘zlangan asosiy maqsad ikki davlat talabalari ishtirokida Toshkent, Samarqand va Nukus shaharlarida «Orol dengizi atrof muhitini muhofaza qilish va tiklash» mavzusida xalqaro konferensiyalarni o‘tkazish bilan izohlanadi.
Shuningdek, Janubiy Koreya delegatsiyasi safar doirasida ikki tomonlama rasmiy uchrashuvlar hamda respublikaning qator oliy taʼlim muassasalarida davra suhbatlari o‘tkazishni rejalashtirgan.
Elchixonada bo‘lib o‘tgan uchrashuv so‘nggida tomonlar o‘rtasida bo‘lajak safarni samarali amalga oshirish maqsadida doimiy aloqalarni davom ettirishga hamda tegishli maʼlumotlarni almashishga kelishib oldilar.
