29/May/2023 "Dunyo" AA reportaji
TOSHKENT, 29-may. /“Dunyo” A/. Poytaxtimizdagi Mirzo Ulug‘bek nomidagi markaziy istirohat bog‘ida O‘zbekistonda akkreditatsiyadan o‘tgan diplomatik missiyalar o‘rtasida madaniy anʼanalar va milliy taomlar XIX xayriya festivali bo‘lib o‘tdi, deb xabar bermoqda “Dunyo” AA muxbiri.
Fetivalda Ozarbayjon, Afg‘oniston, Misr, Belarus, Hindiston, Italiya, Indoneziya, Saudiya Arabistoni, Janubiy Koreya, Kuvayt, Qirg‘iziston, Qozog‘iston, Malayziya, BAA, Falastin, Rossiya, Ruminiya, Tojikiston, Turkiya, O‘mon, Chexiya, Shvetsariya va boshqa davlatlar o‘zlarining boy milliy koloritini namoyish etdi.
Tadbirning tantanali ochilish marosimida, O‘zbekiston TIV huzuridagi Diplomatik korpusga xizmat ko‘rsatish byurosi 2000 yildan buyon madaniy anʼanalar va milliy taomlar festivalini o‘tkazib kelayotgani, u mamlakatimizda faoliyat yuritayotgan elchixonalar oshpaz xodimlarining muhim tadbirlaridan biriga aylangani taʼkidlandi.
O‘zbekiston tashqi ishlar vazirining o‘rinbosari G‘ayrat Fozilov o‘z nutqida, anʼanaviy tarzda o‘tkazib kelinayotgan mazkur festival mamlakatimiz madaniy hayotini mazmunan to‘ldirib, poytaxtimiz aholisi va mehmonlariga festivalda ishtirok etayotgan mamlakatlar madaniyati hamda turizmi bilan yaqindan tanishish imkonini berishini, shuningdek, madaniyat va sayyohlik sohalarining rivojlanishiga xizmat qilishini bildirdi.
Festivalda xorijiy davlatlarning keng turdagi milliy taomlari namoyishi bilan bir qatorda folklor-etnografik jamoalar o‘z sanʼatini namoyish etdi.
