22/Dekabr/2021 Ta'lim
KIYEV, 22 dekabr. /“Dunyo” AA/. Universitetlararo hamkorlikni yo‘lga qo‘yish maqsadida Ukrainaning Xerson davlat universiteti (XDU) rektori Aleksandr Spivakovskiy boshchiligidagi delegatsiya O‘zbekistonga tashrif buyurdi, deb xabar bermoqda “Dunyo” AA muxbiri.
Ukraina vakillari Samarqand davlat tibbiyot instituti (SDTI) tashabbusi bilan tashkil etilgan “Samarqand – 2020” ikkinchi xalqaro olimpiadada ishtirok etdi.
Muzokaralar chog‘ida XDU va SDTI o‘rtasida hamkorlik memorandumi imzolandi. Hujjatda pedagogika, psixologiya, tarix va sotsiologiya yo‘nalishlarida taʼlim va ilmiy hamkorlik istiqbollari bayon etilgan.
Kelgusi yilda birgalikdagi faoliyatni yo‘lga qo‘yish maqsadida SDTI delegatsiyasining Ukrainaga tashrifi rejalashtirilmoqda.
Rektor Aleksandr Spivakovskiy SDTIning yuqori kurs talabalari uchun “Yetakchilik yoki biz hammamiz o‘zgarishni o‘rganishimiz kerak” mavzusida maʼruza o‘qidi.
Tashrif yakunlarini sharhlay turib, XDU rektori shunday dedi: “Maqsadimiz – O‘zbekistondagi oliy o‘quv yurtlari bilan uzoq muddatli aloqalarni qayta tiklash. Bu talabalar uchun mobillik, xalqaro olimpiadalar va o‘qituvchilar uchun ilmiy loyihalarda birgalikda qatnashish kabi yo‘nalisharni o‘z ichiga oladi”.
