18/Iyul/2022 Ta'lim
TOSHKENT, 18-iyul. /“Dunyo” AA/. Talabalar o‘qishini xorijiy mamlakatlarda faoliyat yuritayotgan (jumladan, xalqaro tan olingan reytinglarda birinchi 1000ta o‘rindan birini egallagan) oliy taʼlim tashkilotlaridan O‘zbekistondagi davlat oliy taʼlim muassasalarining mos va turdosh taʼlim yo‘nalishlariga ko‘chirish bo‘yicha arizalarni onlayn qabul qilish davom etmoqda, deb xabar bermoqda “Dunyo” AA muxbiri.
O‘zbekiston Oliy va o‘rta maxsus taʼlim vazirligi telegram-kanali maʼlumotiga ko‘ra, xorijiy davlatlardan o‘qishni ko‘chirish bo‘yicha arizalarni qabul qilish 15- iyuldan 5- avgustga qadar my.dtm.uz saytining «O‘qishni ko‘chirish (xorijdan)» bo‘limi orqali amalga oshiriladi.
Xorijiy davlatlardan o‘qishni ko‘chirish bo‘yicha o‘tish ballari Oliy va o‘rta maxsus taʼlim vazirining tegishli buyrug‘i bilan tasdiqlangan bo‘lib, o‘tish ballari bilan info.edu.uz sayti orqali tanishish mumkin.
Talabalar o‘qishini xorijiy mamlakatlarda faoliyat yuritayotgan oliy taʼlim tashkilotlaridan davlat oliy taʼlim muassasalarining mos va turdosh bo‘lmagan taʼlim yo‘nalishlariga ko‘chirishga ruxsat etilmaydi, deyiladi manbada.
