SEUL, 20-aprel. /Dunyo" AA/. Avval xabar berganimizdek, shu yilning 16-18 aprel kunlari O'zbekiston musulmonlari idorasi raisi, muftiy Nuriddin Xoliqnazarov boshchiligidagi mamlakatimiz delegatsiya amaliy tashrif bilan Janubiy Koreyada bo'ldi, deb xabar qilmoqda "Dunyo" AA muxbiri.

Tashrif davomida Koreya musulmonlar federatsiyasi (Korea Muslim Federation) rahbariyati bilan muloqot o'tkazildi, O'zbekiston musulmonlari idorasi va Janubiy Koreya musulmonlari federatsiyasi o'rtasida ikki tomonlama hamkorlikni yana-da rivojlantirish uchun asos bo'ladigan anglashuv memorandumi imzolandi.

Shuningdek, Janubiy Koreyada vatandoshlarimiz gavjum istiqomat qilayotgan shaharlarda diniy-ma'rifiy mavzuda ma'ruzalar tashkil etildi. Ana shunday uchrashuvlardan biri poytaxt Seuldan 350 kilometr uzoqlikdagi Kimxe shahridagi "Al-Buxoriy" masjidida o'tkazildi.

Muftiy hazratlari so'z avvalida vatandoshlarimizga xalqimizning salomlarini yetkazish barobarida ilm olish va halol rizq talabida kasbu hunar o'rganayotgan musofirlarimiz egallagan bilim va malakasi bilan kelgusida yurtimizdagi turli sohalar rivoji hamda aholi farovonligiga hissa qo'shishlari zarurligiga urg'u qaratdilar.

Shu bois, asl maqsad-muddaodan chalg'imasdan bugungi murakkab davrda turli fitna va xurujlardan o'zlarini muhofaza qilishlari muhimligini ta'kidladilar.

Uchrashuvda diyorimizda amalga oshirilayotgan diniy-ma'rifiy jabhadagi yangilanishlar haqida so'zlash barobarida vatandoshlarimizga yashayotgan mamlakat qonun-qoidalariga amal qilish, musulmonlik odobiga rioya etish va millat sha'nini saqlash kabi dolzarb masalalar ham bayon qilindi.

Shayx Nuriddin Xoliqnazarov hazratlari hamyurtlarimizning savol va takliflariga javob berib, o'zlarining muallifligida chop etilgan "Fiqh va aqidaga oid ixtilofli masalalar yechimi", "Rabboniy nidolar", "Tasadduq, yo Rasululloh", "Alloh meni ko'rib turibdi" va "Islomda Vatan tushunchasi" nomli adabiyotlarni masjid kutubxonasiga hadya qildilar.

Uchrashuv yakunidagi xatmi Qur'on duolarida Allohdan butun dunyoga, xususan, yurtimizga tinchlik-farovonlik, vatandoshlarimizga sog'lik-omonlik, ilm va kasb-korlariga qut-baraka so'rab duo qildilar.

O'z navbatida, Janubiy Koreyada vaqtincha istiqomat qilayotgan, ish faoliyati bilan shug'ullanayotgan va oliy ta'lim muassasalarida ta'lim olayotgan vatandoshlarimiz ushbu uchrashuv uchun minnatdorlik bildirib, fayzli suhbat Vatanni sog'ingan qalblarga taskin bo'lgani, ayniqsa, kelgusida ilm o'rganib, tajriba hosil qilgach, albatta, yurtga qaytib, O'zbekiston taraqqiyoti yo'lida xizmat qilishlarini bildirdi.

Mana shunday o'zgarish va yuksalishlarni amalga oshirishga tashabbus ko'rsatayotgan davlatimiz rahbaridan cheksiz minnatdor ekanlarini izhor etdilar.

Shu bilan, O'zbekiston musulmonlari idorasi raisi, muftiy Nuriddin Xoliqnazarov boshchiligidagi delegatsiyaning Janubiy Koreyaga amaliy tashrifi yakuniga yetdi.