TOKIO, 25-mart. /"Dunyo" AA/. O'zbekiston delegatsiyasi Yaponiya tashqi ishlar vazirining parlamentar o'rinbosari Yoichi Fukazava bilan uchrashuv o'tkazdi, deb xabar bermoqda "Dunyo" AA muxbiri.

"O'zbekiston boshqa mintaqalardagi davlatlarga nisbatan siyosiy va iqtisodiy barqarorligi bilan alohida ajralib turadi. Ayniqsa, so'nggi yillarda mamlakatingizda amalga oshirilgan keng ko'lamli islohotlar natijalari tahsinga sazovor. Yaponiya O'zbekistonni Markaziy Osiyo mintaqasidagi strategik sherik va yaqin hamkor davlat sifatida ko'radi. Ushbu mintaqada tinchlik va barqaror rivojlanishni ta’minlashda mamlakatingiz juda muhim o'rin egallaydi" – deya qayd etadi Yoichi Fukazava.

Shuningdek, Yoichi Fukazava joriy yil mart oyida O'zbekiston TIV rahbarining Yaponiyaga tashrifini yuqori darajada o'tkazishga katta e’tibor qaratilgani, tashrif doirasidagi ikki tomonlama uchrashuvlar va qo'shma biznes-forum muvaffaqiyatli o'tkazilganini alohida ta’kidladi.

Jumladan, tashkil etilgan "O'zbekiston-Yaponiya biznes-forumi"da Yaponiya iqtisodiyotining turli sohalarida faoliyat olib borayotgan 300 ga yaqin kompaniyalarning ishtirok etishi – yapon tomonining mamlakatimizga investitsiya kiritish, iqtisodiy aloqalarni kuchaytirishga bo'lgan katta qiziqishiga dalil bo'lishi ma’lum qilindi.