ТОШКЕНТ, 19 февраль. /"Дунё" АА/. Ўзбекистон ташқи ишлар вазири Бахтиёр Саидов кеча Испаниянинг янги тайинланган элчиси Рикардо Мартинес Васкесдан (қароргоҳи Москва шаҳрида жойлашган) ишонч ёрлиқларини қабул қилиб олди, деб хабар бермоқда "Дунё" АА мухбири.

"Испаниянинг Ўзбекистондаги янги тайинланган Элчиси Рикардо Мартинес Васкес жанобларининг ишонч ёрлиқларини қабул қилдик, – деб ёзди Ўзбекистон ТИВ раҳбари ўзининг telegram-каналида. – Мамлакатларимиз ўртасидаги икки томонлама муносабатлар динамикаси юқорига қараб кетаётганлиги яққол намоён бўлмоқда. Икки мамлакат ташқи ишлар вазирликлари биргаликда ҳаётга татбиқ этиши лозим бўлган улкан имкониятларни алоҳида эътироф этдик. Жаноб элчига Ўзбекистон-Испания ҳамкорлигининг янги йўналишларини ривожлантиришда ва самарали фаолият олиб боришида омад тилаймиз".

66 ёшли тажрибали дипломат Рикардо Мартинес Васкес Испания ТИВ марказий аппаратида ва хориждаги дипломатик миссияларда турли лавозимларда ҳамда Германиядаги элчи вазифасида ишлаган. У 2024 йил июль ойидан буён Испаниянинг Россиядаги элчиси сифатида фаолият олиб бормоқда.

Эслатиб ўтамиз, Фаррух Турсунов 2023 йил декабрь ойидан буён Ўзбекистоннинг Испаниядаги элчиси лавозимида ишлаб келмоқда.

"Дунё" АА олган сурат